IAS versus College zirtirtute

6th Pay hman ṭan dawn khan College zirtirtute hlawh tih ṭhat deuh a ni a. ‘College zirtirtute hlawh chu IAS super time scale aiin a sang tawh dawn’, tih kha a lar hle a. Mi nawlpui tan chuan college zirtirtute chu IAS aia hlawh ṭha zawk viau tura ngaih a awl hle. Mahse, han hriat chian chuan IAS te pay chu a thlanawm zawk viau mai. 

IAS ni turin graduate nih a tawk laiin, Assistant Professor ni chuan Master degree neih phawt a ngai. Graduate hlima IAS nih nghal theih chuan Assistant Professor te lakah kum 2 an lo hlep thei. Kaisang zel turin IAS te chuan zir san belh kher an mamawh lo; Assistant Professor te erawh chuan Associate Professor kai turin PhD degree an neih ngei a ngai. 

Table-a a lan ang khian a tirah chuan Assistant Professor-te hlawh a sang zawk a, mahse senior lamah chuan IAS chu an awhawm zawk hle. Mizoram state hnuaiah chuan college pakhatah Professor pakhat chiah a awm theih a, chu Professor chu a pension hma chuan midang tan Professor nihna chance a awm lo. Senior Professor post hi a awm leh awm loh ka chiang lova, a awm pawhin kai an tlem khawp ang.

Kan Matric topper ho (top ten) hian matric pass tirh aṭangin IAS nih tumin bei ta hlawm se, mi 5 pawh lo hlawhtling se  IAS chu kan ngah chak ngawt ang. Doctor nih an tum deuh fur zel si a, a buaithlak a ni. IAS nge nge chu an lo awhawm ber mai, an hlawh baka an hamṭhatna hrang hrang hi awhawm tham a ni. Professor ho chu an hlawh bak hamṭhatna dang dawn vak an nei lo, Principal te an nih theih hlauh chuan an dawng ve leh deuh a ni mai. Chuvangin, IAS nih hi in tih hmuh chi a ni e. 

IAS versus Doctor tih te. IAS versus Judge etc. han ziak ve teh u.