TUNGE MIZO BÎK?

Hman lai Kristian kan nih hma chuan Hmar-hovin Ṭawng hrang leh Sakhaw biakdan hrang, Puithiam leh Bawlpu an nei hrang a. Ralte hovin Ṭawng hrang leh Sakhaw biak dan hrang, Puithiam leh Sadawt hrang an nei bawk. 

Chutiangin Pawi, Paite leh a dangte pawhin ṭawng hrang leh sakhaw biak dan hrang an nei ṭhin. Lusei pawhin ṭawng hrang an nei a, Sakhaw biak dan leh Puithiam leh Sadawt hrang, inthawina thiam hla hrang an nei ṭhin. 

Chung zawng zawng bakah ka sawi lan loh hnam chi dangte nen chuan 'Mizo' vek kan ni, Mizo hnam bîk an awm lo. Lusei ram (Lusei/ Lushai) a awmten ṭawng tualleng atan Lusei ṭawng kan hmang. Hmar rama awm Luseiho pawhin Hmar ṭawng an hmang ve mai. Pawi rama awm Lusei leh Hmar pawhin Pawi/Lai ṭawng an hmang mai. 

Heng hnamte hi Mizo kan ni a, ṭawng tuallengah Lusei ṭawng kan hmang mai. Lusei ram (tuna Mizoram) a awmte hian Lusei ṭawng kan hmang a. Pawi emaw, Hmar emaw, Paite ṭawng zawng zawng pawh Mizoṭawng tho a ni. 

Mizoṭawng ni ta bîk riau a awm lo a, Mizo riau kan awm bik lo, Mizo lo riau pawh kan awm bîk hek lo. Inpumkhatna atan Lusei ṭawng hi kan hmang mai a ni.