ZIRLAITE LEH FUTURE PLAN

Matric result a chhuak a, Pâwl 12 result pawh a chhuak leh dawn ta. Zirlai tam takin mahni subject duh leh tui zawng kan thlan thiam a ngai leh dâwn e. Zirlaite hmakhua thlîrin college kal zawm tumte tâna subject thlan turah kan fimkhur thiam theihnâ a nih beiseiin lo chhiar chhuak ve hram teh aw. 

Hma kan sawn tawh viau laiin lehkha thiam hna nei lo kan tam ta viau erawh thil pawi tak a ni. Chuvangin, ram changkàng zâwkte tih entawna Job Oriented Course kan thlan thiam a pawimawh ta. Mi ṭhenkhat bengvâr tak leh zirna lama mahni inhai kaw zo tak tak an awm laiin a tam zâwk hi chuan science stream aṭang chauhin professional course te hi zir theih niin kan la ngai a nih hmèl. Arts aṭanga zir theih tlêm azâwng leh a làr zual ka'n tárlang dâwn a ni.

1. BA: BA hi General Education anga kan hriat lâr êm êm a ni. Competitive exam lama tui mi tân BA zir hi a ṭha. 

2. BBA Health Care Management: He course hi university tam takin an pe chhuak. Kum 3 course niin a zir chhuakte hian hospital administrative staff hna an thawk thei. Metro Cities-ah leh Hospital lian tak takah Administrative Staff angin an ruai ṭhin. 

3. BBA Cyber Security: Information technology a sàn chhoh zèl avàngin cyber security hi course demand sáng ber pâwl a ni mêk. Company hrang hrang leh sawrkar pawhin an information leh data pawimawhte a him theih nân security ṭha tak an mamawh a, a scope hi a ṭha hlè niin a lang. A zir hun chhung hi kum 3 a ni.

4. BBA Oil & Gas Management: A tel lova kan awm theih loh a nih avangin oil & gas lama sumdàwnna hi chak takin a ṭhang mêk a. Hetiang lama tui mite tan course ṭha tak a ni. A zir hun chhûng hi kum 3 a ni. Hna awm theite chu Accounts Manager (oil), Asst Project Manager (oil), Plant Assistant Manager, etc. 

5. Bachelor of Hotel Management & Catering Technology: Hospitality Industry hi khawvèl ram hrang hrangah employment generator lian ber pâwl a ni mêk. A ṭhan chak êm avàngin demand pawh a sang zèl a, Mizo paw'n kan hre chho ṭan viau. He course zir zo te hi Hotel, Cruise leh Retail Sector dang tam takah an thawk thei. Ram chhûng leh pâwn, International Hotel-ah te demand a sáng êm êm a ni. 

6. Bachelor of Tourism & Travel Management (Airlines): He course hi kum 4 zir a ni. He course zir chhuakte hi airlines, tourism leh hospitality line-ah hna an thawk thei vek. He course hi Foreign Education System (10+2+4) zûl zuia duan niin kum 4 course a ni. 

7. Bachelor of Journalism & Mass Com.: Journalist te hi ram leh hnam hmêlhmang lanna pawimawh tak an nih avàngin hei hi course ṭha tak a ni a, a hna hi a zahawm hle bawk. Print media emaw TV Anchor angten hna an hmu thei. 

8. Bachelor in Physical Education & Sports: He course hi kum 3 zir a ni a, mi hrisel leh infiamna lama tui mite tân zir chi a ni. School-ah Physical Education Teacher leh Sports Trainer hnate an thawk thei. 

9. BA, LLB: He course hi kum 5 zir tur a ni. Hei hi class 12 zawha zirin kum 5 chhûng zir tur a ni a. Law lama tui mite tân zir chi a ni. 

10. Bachelor in Animation & Multi­media: He course hi animation lama tui mi, drawing leh sketching skills nei ṭhate tân course ṭha tak a ni. Animation industry hi a ṭhang chak hlè a, animation-ah hian hna a tam bawk. 

11. Bachelor of Fine Arts: He course-ah hian Arts lama tui mi leh talent nei ṭhate tan hlawhtlin theihna chance sang tak a awm. A zir chhuakte hian specialization a zirin Ceramic Artist, Art Director, Animator, Sculptor, Painter leh hna dang tam tak an thawk thei. He couse hi kum 4 course a ni.

12. BSc Fashion Designing: Fashion lama tuimi leh idea nei ṭhate tân Fashion designing hi course thlan­âwm tak a ni. 

13. BCA: Computer application leh programming lama tui mite tân course ṭha a ni a, a zir hun chûng hi kum 3 a ni. 

14. BBA: Sumdâwnna lama tui mi leh mahnia sumdâwnna ṭan duhte tân BBA zir hi a ṭha. Kum 3 course a ni. 

15. ANM (Auxilliary Nursing & Midwifery & GNM (General nursing & midwifery): Nursing lama tui mi tan heng course te hi a ngaihven theih. 

16. Bachelor of Performing Arts (music/ dance/ theatre): Hei hi kum 4 course a ni a, performing arts lama tui mi tana zir chi a ni. 

Hêng bakah hian course zir theih dang tam tak a la awm, kan ziak vek sêng lo ang. A tlângpuiin kan zir theih chi te chauh ka'n tárlang a ni. Pawl 12 zawha kan zir tur kan thlan hian kan hmalam hun thui tak a hril avangin zirlaiten thil tum fel tak nei a, chumi ti hlawhtling tura uluk taka ngaihtuahna sêng chunga kan zir tur kan thlan thiam a pawimawh.

Pâwl 12 zir mêkte leh pass thar tur zawng zawngte, kan ram leh hnam hmakhua ngaia ‘Future Plan’ fel tak in siam theih nân duhsakna sáng ber ka hlàn a che u. 

Lalhmingmawia Ralte
Lecturer
Govt. Republic HSS, Aizawl