Traffic jam leh parking duhdah

Tunlaia titi lian tak chu Aizawl khawpui traffic jam tihziaawm dan a ni a, hei hi chu awlsam tein a bul a ṭan theih. Hnam Run bula parking aṭang hian ṭan se a fel nghal duak ang. 

Aizawla lirtheiin Traffic Police an hlauh lohna ber chu political party office bulah leh party inkhawmpui velah hian a ni. Tu party pawhin inkhawmpui nei dawn se hmun dang zawnga ti duh lovin Vanapa Hall-ah an han ti kher zel a, a chhung thawl deuh pawh ni se pawnah ṭhutthleng an han rem lui kher a, Aizawl traffic a jam mup mup khan hlawhtlingah an inngai ta ṭhin a ni. 

Congress sorkar lai khan Bhawan chhuk thlaa parking hi a buai thei niai niai hle tih mipuiin kan hria a, lal ber ber awm khawm an nih vangin Traffic Police pawhin tihngaihna an hre lo. MNF sorkar hun a thleng ta a, Hnam Run kawtah hian an duh dan danin motor an dah a. Assam Rifles bang lamah ni se an duh chin chinah lirthei an dah a, parking area pawh an zah lo. MNF nih chuan Traffic Police man theih loha inngaihna an nei a nih a rinawm. Traffic Police pawhin an ti ngam lo niin a lang bawk a, Hnam Run kawt parking hi in tlan pelh pahin lo en ve mah teh u, an duh duh danin lirthei an dah mai ṭhin nia! 

Party lian leh sorkarna chelhtu an ni bawk a, Congress hunlai ang maiin mahni office kawtah lirthei dah niai nuai lovin han hung fel thlap mai ula. Hnam Runa kal tlai deuh kha chuan lirthei dahna a awm tawh loh na na na chuan ruling pawh ni se hla deuh takah, lirthei dahnaah ngei dah mai se a ṭha ang. 

Parking sawi takah chuan Vishal dawr an hawng a, a bul vel parking-ah hian an lal ta em em maiin ka hria. Tun hnaiah Chanmari-ah Westside an hawng ve leh a, kawngpuiin a zim phah hle a, Ramhlun North lama Yamaha showroom an hawn pawh khan a kawtah a hranpa parking awm leh nen kawngpuiin a zim phah leh bawk. 

Dawr lian leh langsar an nih vangin ka han sawi lang mai a ni a, entirna chauh a ni. Dawr lian dangte pawh hetiang chi hi a tam khawp mai. Hengte hi mumal taka Local Council, AMC, Traffic Police te nen en a ngaiin a lang.