Hnam dang pasal neih

Aizawl khawpui ngei-ah pawh hnamdang kawppui nei hmuh tur an awm ta thluah mai. Phai lama tun hmaa kan hmuh leh sawi ṭhin kha tunah chuan kan zingah mi tam tak an awm ta a, a bikin kan Mizo hmeichhiate hian hnam dang pasal neih an ching deuh zawk niin a lang. 

Hnam dang neih hrim hrim hi Mizo rilru leh Mizo thinlung aṭang chuan a pawi nghal sa reng tawh a, mahse miin hmangaih leh duh taka hnamdang kawppui a neih hi keia Mizo rilru zim tak leh hnam hmangaihna rilru nia inngai tan han khap ngawt theih a ni lo. Mizo hmeichhiaten hnam dang pasal an neih loh kan duh a nih chuan, Mizo mipate hi kan ṭan a ngai ve a ni phawt mai. Mizo hmeichhia hnamdang pasal nei tam tak te sawi ṭhin chu Mizo mipa pasala neih tur ka hmu lo an ti deuh zel mai. Chuvangin Mizo mipate hi kawng hrang hrangah hma kan sawn a ngai a, kan hmeichhiate neih tlaka kan awm a ngai tihna a ni phawt mai. 

Hetiang zawng hian sawi dan a awm ve leh bawk a. Mizo mipa ṭhenkhat sawi dan chuan Mizo hmeichhia, "Mizo mipa pasal tlak an awm lo" titu zingah hian Mizo tlangval fel tak nupui ni tlak, nula fel tia sawi ngam an vang ve thung khawp mai tih a ni. Chuvangin kan hmeichhiate pawh hian an leirawl lai aṭangin an nun hi uluk ve se. An nihna hniam leh san chu kan sawi phak a awm lo a, anmahni pawhih an duh thua nihna sang nei mai thei an ni bik lo. Mahse pasal neih dawna duhtui leh si, Mizo tlangval felin an iai tawh si, an phu tawk Mizo tlangval iai ve leh si hi mi tam tak an awm thei dawn tlat a ni. 

Hnamdang neih leh kawp hriatthiamna thui tak nei khawpa hmeichhe rilru zau hi an lo tam ta hle mai a, amaherawhchu Mizo mipate leh mi nawlpui hian a bikin Vai pasal neite hi kan ngaithei tlat si lo lai hi a buaithlak a, chuvangin, nun uluk ila, mahni hnam puite ngei neih tlakin i awm ang u. Hnam thilah chuan a ho mai mai tih ngawt zel hi thil dik ber a nih lem lo thei tlat a, mipa dinhmunah han in dintir ila, thikthu tihchhiat pawh hi a ṭhatna lai a awm ve tlat bawk a ni. 

Entirnan Mizo mipate hian Vai mipaten kan hmeichhiate Mizorama an tal pui ang mai mai hian vairamah vai hmeichhia Mizo mipaten han tal pui chhin ila vai mipa ho chu an ri ṭhak mai ang. Mi hmuh loh chuan lo khawsa pawh nise hnam humhalh chu thu hran, khaw eng pawh an zah ve deuh tur a ni tih hi ngaihdan pawmawm tak a ni ve tlat a ni. Tin, hnam dang mipate Mizo hmeichhiate laka an huangtau lutuk tur pawh mipate hian kan ti tim ve thei a nia. 

MHIP lam pawh hian inthlan ringawt puaipui loin hnam thilah pawh hian rilru seng ve se. Mizo hmeichhiate humhalh kawngah hian uluk deuh zawkin hma la ngam se, a ṭul chuan hnam dang laka mawi leh khawpa kapkalak tizau zual deuhte phei hi chu zilhhau ve bawk se. 

North East mi anga min zah lo deuh a nih pawhin Mizo hnam ang zawng hi chuan hmuhsit awma kan awm loh nan MHIP hi Mizo hmei­chhiate lakah thikthu han tichhe ve deuh se, hnam ang pawhin kan mawi lehzual ngei ang. Hnamdang kan haw ngawt lo ve. Mizo hmeichhe awm ṭha duh lo ho vanga kan hnam mualpho lutuk ṭhin hi a pawi ka ti a ni. Hnamdangin a Mizo anga min zuam loh nan a hmei a pa in nun i uluk tlang ang u.