Lengpui Airport chhiat nge Jet Airways tlak chhiat vang?

“Ṭumhmun chung­changah CM leh Aviation Wing hotupa sawi inang lo - 

Hotupa berin runway a ṭha tawk lo a tih laiin Aviation Wing hotupa, pilot hlui chuan runway chu thlawhna lian tum nan a la that tawk thu a sawi thung. February 21 khan Synod hruaitute leh MLA tharte Synod pisa-a an inkawmnaah thu sawiin Chief Minister Zoramthanga’n, “Tuna kan buaina ber chu thlawhtheihna a ni a, state danga zin turin Silchar-ah te kal a ngai a ni. Ka hmuhchhuah thar chu (Lengpui airport-a) thlawhtheihna runway khu a rei tawh lutuk a, resurfacing tih a nih ngai loh avangin thlawhheihnate an thlawk ṭha duh lo,” a ti. 

CM chuan Lengpui Airport runway a ṭhat loh avangin thlawhtheihnate’n seat khata passenger an phur ngam loh thu sawiin, “A phurh theih chin aṭanga 80% vel chiahte an phur thin a, chuvangin an hlawk lo a ni,” a ti a, airport runway siamṭhat hna chu thawk nghal tura PWD-te a hriattir thu a sawi a, “A rang a ranga kan tih loh chuan kan buai tawh. Pawisa awmsa cheng vbc. 11 a awm a, cheng vbc. 24 vel a ngai dawn niin an sawi. Pawisa chu a awm mai ang tiin zan lamah hna kan ṭan tir nghal char char a ni,” a ti.

Hetih lai hian, GAD Avia­tion Wing-a Principal Con­­sultant thar Wg Cdr J Lal­hmingliana chu March 5 khan a pisa-ah MJA member te nen an inkawm a, hetah hian Lengpui tumhmun chu duhthusam ni lo mahse, thlawhna lian tumna turin a la tha tawk niin a sawi a, “Airport hi thuneitute’n an endik dawn a, cheiṭhat ngai an tih loh phei chuan cheiṭhat kher a ṭul lo ang,” a ti a, Lengpui Airport chu thawk leh khata cheiṭhat thut theih a nih loh thu sawiin, sum awm mahse, chei ṭha tur chuan tih tur a tam a ti a, “Sum chu a awm a, mahse, cheiṭha tur hian a process a thui hle. Hna thawh dawn hunah Airport-a thawktute hnathawh hun tur leh thlawhtheihna tum theih hun tur hriattir a ngai dawn a, kan la hriattir lo,” a ti. 

Airport cheiṭhat chung­chang chu thuneitute’n an endik hnuah a chian tur thu a sawi a, CM-in ṭumhmun ṭhat loh vanga thlawhna service ṭha duh lo anga a sawi chu sawifiah sakin, “Runway that loh vang, tih hi a dik tho laiin, a dik chanve deuh a, thlawhna ṭumna tlak a ni lo, tihna a ni lo,” a ti. J Lalhmingliana chuan Indigo Airlines Lengpui-ah rawn service an tum thu leh ṭumhmun chu duhthusam ni lo mahse, an rawn service a beisei thu te, an rawn service hun tur erawh a chian loh thu leh March thla chhunga an rawn service hman a rinawm loh thu a sawi.” 

Hetah hian Lengpui Airport chung­changa ngaihdan insai kalh tak pahnih a lo lang a, hei hi Mizoram mipuite hian kan hriat chian a ṭha khawp mai. Tunlai khawvelah chuan engkim mai hi finfiahna neih theih a ni a, awlsam taka a dik leh dik loh hriat theih a ni ta. Tuna thil lo lang hi chu ngun deuhin han chhiar ila, Lengpui Airport chungchanga thusawi a ni a, kan ram hotupa ber, kan state pa bera kan ngaih Lengpui Airport enkawltu kan mi thiam thusawi a ni. A inang lo hle a ni. 

Keini mipui nawlpui (common people) in kan lo hriat ve chu Jet Airways tlak chhiat thu a ni. Jet Airways tlachhe tur khan hmun ṭhenkhatah an thlawhtheihna service an titawp hmasa a, a tihtawp zingah India hmar chhak hmun hran ghrang a tel a, Lengpui Airport pawh a tel a ni. Jet Airways hian an tihtawp hma deuh khan ṭum danga la awm ngai lo Delhi - Lengpui direct flight-te pawh an rawn dah hman a. Lengpuiah thlawhtheihna hrang hrang a ṭum a, ṭum ngam loh leh a khata inphurh ngam loh an neih thu hi kan hre ngai lo reng reng. 

Kan CM berin, “Ka hmuh­chhuah thar,” a tih hi a source hriat a chakawm ngawt mai. A chhan chu tunah hian Jet Airways thlawhtheihna a awm tak lovah chuan Air India chiah kan nei ta a, thlawhtheihna lut leh chhuak hi seat a full chho char char ang a ni mai an tih chu. Hman ni lawkah kan chhungte an zin chhuak a, a kar lehah an lo thlawk haw a, thlawhtheihnaah seat ruak a awm leh awm loh ka zawt kher a, a khah vek tawh thu an sawi. 

Aizawla flight ticket zuar chhuaka kum 10 chuang ei­zawng tawh kan ṭhian nu pa­khat ka zawt leh a, “Mizoram thlawhtheihna chu tunlai chu a full reng ang vel a ni a, a ticket man a to uchuak lutuk a, chuvangin Silchar lama thlawk tur ticket hi kan la nasa. Lengpuia lut leh chhuak thlawh­theihna seat hi a full deuh reng a, indaih loh a na hle,” tiin a sawi ve bawk.