Sawi hlawh PAHOSS hi

MNF-in sorkarna an rawn siam leh tirh khan chief minister Pu Zoramthanga khan tui pui deuh deuh a nei a, chung zinga keiin ka lo ngaiihven em em pahnih chu Parking House Support Scheme (PAHOSS) leh mau chungchang hi a ni.

Kan Chief Minister hian mau hi a tuipui em em a, kum 20 vel a buaipui tawh thute a sawi a ni. A fakawm ka ti a, a seh tawh a seh tlatna hi a entawntlak ka ti hle. Chutih rualin, kei chuan kan CM ang sawi ang hian mau hmang hian kan ramin hma a sawn phah ka ring lem lo. A lo hlawhtling a nih chuan thil lawmawm tak a ni dawn a, kan Chief Minister ka fakin, a hmathlir ropui ka ti viau ang.

Pu Zoramthanga duan chhuah PAHOSS erawh ka tuipui a, a ṭha ka tih takzet. Kan Aizawl khawpui hi traffic jam avangin khawpui hrehawm tak a ni chho ta mek a, khawpui zim teah si hian inkalpawhna atan hun a duh rei em em a ni. Chumi sutkianna kawng pakhat atana PAHOSS a duang chhuak hi kan Chief Minister hi fakawm ka ti takzet. Ngaihtuahna a seng tih a hriat takzet. Mah se, PAHOSS chu kalpui chhoh an ni ta a, ṭanpuina dawng pawh an awm ta nual. A scheme ṭha ka tih tehlul nen a kalpui dan erawh ka duhthu a sam lo tak zet zet. 

Ka lo beisei dan chuan Kulikawn to Zemabawk main road-ah, Temple to Vaivakawn, Vaivakawn to Chanmari-ah, Chanmari to Chaltlang, Chaltlang to Bawngkawn, Chan­mari to Bara Bazar-ahte PAHOSS hi hman ṭangkai hmasak a nih ka lo ring a, mahse a ni ta hauh lo mai. PAHOSS dawng list kan en a, traffic jam awm mang lohna tur hmuna chengte'n cheng nuai tam tak an dawng ta tlat mai. Scheme ṭha taka ka lo ngaih hi a duang chhuaktu Chief Minister ngaihtuahna leh duan chhuah chhan anga kalpui a ni ta lo em ni tih a awl ta hle. PAHOSS dawng tam tak hi chu vantlangin an chhawrin a rinawm loh a, an tan a thlawnin pawisa a dawng a ni berin a rinawm.

Aizawl khawpui traffic jam zualna a chunga route hrang hrangah te hian PAHOSS hi hmang ṭangkai nise chuan traffic jam chhan ber pakhat kawng sira lirthei in hung ṭhup hi a reh phah ngeiin a rinawm. A ṭangkaina tur hmunah PAHOSS hi chu hman nise chuan tuna AMC parking tam tak pawh hi a awm kher a ṭulin a rinawm loh.

A dawngtu chu tu pawh ni se, Aizawl traffic jam tihziaawmna atan kawng ro a su em tih a pawimawh ka tih ber chu a ni. Ṭangkaina nei lem loa tute emawin an in sakna atan emaw an in zauhna atana an hmang mai mai a nih chuan sum luangral tur zozai hi a uihawm e mai.

Kan CM-in thil ṭha tak a ngaihtuah PAHOSS hi kan la kalpui zel dawn a nih chuan fimkhur taka kalpui chi a ni. Khing route hrang hrang kan tarlan hoahte khian PAHOSS hi duh an awm chuan midang ai pawhin a rate tihsang zawk hial mah ila, a pawi lo hialin keichuan a ngai.