Social media Chak tak dolet ran a pawimawh

Thawhlehni tlai lamah West Lungdar-ah vai sum­dawn pathum kutthlak an ni a, an chuanna bolero car leh an TV zawrh lai 8 chu hal chhiatsak an ni. 

Kutthlaktu leh mortor haltute hian vai pathumte hi naupang rubotu ni ngeia an ngaih vanga hetianga che ta hi an nih hmel. Nunna em chan an awm lo kha a vanneihthlak tak zet a, Mizoram kan mualpho lutukna tur pawh a tinep deuh e. 

February ni 24 (Thawhṭanni) tlai dar 3 velah West Lungdar naupang pakhatin vai pathumin rukbo an tum thu a sawi a, vai te hi bolero vara chuang an ni tih a sawi a, West Lungdar bakah a chhehvel khua te leh Darlung lam thlengin mipuiten nau­pang rukbo tumtu nia sawite hi an dap nghal a ni. 

Ni 24 tlai lam leh zan­khuain he thil thleng nia sawi hi social media-ah nasa takin a darh a, rinthu leh ngaihdan a tam a, West Lungdar leh a chhehvelah chuan boruak a sa hulh hulh a ni ber. 

February ni 25 tukṭhuan ei kham hlimah heng vai TV zuarte hi South Sabual-ah mi ṭhenkhatin an man a, an chuanna bolero erawh naupangin amah ruk bo tumtute chuanna nia a sawi, a var ni lovin a dum a ni thung. 

Heng vai pathumte la tur hian Police tlem azawng South Sabual-ah an kal a, mipuiin an tam hneh avangin West Lungdar lam pan luihpui an ni ta a ni awm e. (Assembly House-a Home Minister sawi danin). West Lungdar-ah hian tlai lamah tharum thawhna hi a thleng ta a ni. 

Heng vai pathumin Vairengte check gate an paltlang hun te, Aizawl Ṭhuampuia an riah thu te leh ni 25 zing lama Darlung leh Sabual lam pan chauh an nih thu te hriat a ni ta zel a. Heng vai pathumte hi an tih ni miah lovah chil hlum mai theih dinhmunah an ding reng tihna a nih tak hmel. 

Social media chak tak karah hian thu dik lo vawrh darh a ni fo a, thu thang dik lo vanga in chil hlumna hi India ram hmun dangah a thleng fo tawh a ni. 

Hetiang hunah hian Police ten social media dolet zat zat hman tura hma an lak 

ṭhin a ṭul tawh niin a lang. Naupang rukbo thu thang pawh kha Law and Order problem lian tak thlen thei a nih avangin police pawh engemawzat an tirh nghal a rinawm a. Hetiang hunah hian mipui thlamuanna thu te, thil awmdan an chhui chian mek thu te, mipuite tana hriat tur awm chin te, mipui thlamuan tura police an tirh chhuah zat te rang taka puanzar nghal zung zung ṭhin nise, mipui pungkhawmin pawi kan khawih ṭhinna hi thui tak a ven theihin a rinawm. 

Mizoram Police te hian social media lamah facebook page leh Instagram account te pawh an nei tawh a, a hun takah an hmang ṭangkai lutuk rih lo niin a lang.