Covid laia audit leh tui harsatna
Covid-19 hri a len lai tak mai khan kan sorkar chak tak chuan Mizoram sorkar Covid-19 dotu ber Health Department chu mak tih hut hut turin an sum an han audit hmak mai a, kha kha mi tam tak chuan ruling party internal politics an ti tlat nia.
Tunah hian Aizawl khawpui tui a hal a, khúa a ṭhal nasa bawk nen tui lei tur pawh a awm lo an tih tawh lai hian PHE Minister chuan tui tlem chhan chu Power supplyama harsatna tawh vang a ti ve leh daih a, Power Department zawk chu a dem awm zawkah a chhuak leh ta hlauh a ni.
Covid-19 hri kan hlauh tak tak lai kha chuan mipuiin thenawm dawrah pawh thil kan lei ngam mang lova, taxi driver leh bus driver ten thawh chhuah pawh an nei thei lova, Mistiri leh labour pawh hnathawk thei lovin an khawsa ve hram hram a, office staff an in kal chhawk lai khan in daih lo chung chung khan Health Department suk kha audit a han ngai tlat bîk a, Department dang kha an audit ve miah lova, Health Minister chu tunge a nih kan hre vek a, audit tura thu pe thei tu pawh tu nge kan hre leh vek bawk si a, Covid-19 avanga hming ṭha tur politician MNF Vice President atanga an bân tak kha Department chan an han audit bik k ha a mak em em a, a mak chhan chu Covid-19 avanga sum che vêl audit tur a nih hrim hrim chuan Disaster Management lam hi audit ngai nasa zawk tura ngaih an ni a, an ni hi sum khawih nasa bakah Covid-19 avanga buai ber an ni zawk hial mai thei a, Disaster Management lam Minister pawh kan hre vek bawk a, hetiang hi miin an lo chhut an lo chhut a ni.
March, 2021-a Aizawl khawpui harsatna chu nuai 3 la sem loh vanga mipui retheihna leh kawng chhawng awm loh avanga traffic jam (TJ) buaina pawh a ni chiah lova, Aizawl khawpui harsatna chu tui awm lo a ni. Private tui chawite chuan 50% aia toin a man chhiar tawh mahse kar khat chuangte nghah ngai khawpin an lûn tho bawk si a, Aizawl khawpuiin tui a nei lo.
Aizawla tui sem tlem chhan leh tui lama harsatna zawhna chu PHE Minister zahawm tak chuan, "A... Kan thiam loh a ni e, kan indaih ngang lo a ni, mihring kan pung si a, tui a tlem tawlh tawlh si," ti ta se miin an dem vak lovang.
PHE harsatna tawh chu Power Department lamah beng per daihin Power Supply hmuh ṭhat loh vang ti zawngin Assembly House ah a sawi a, hei hi thil tak tak pawh a nihna chin a awm tho vang a, mahse PHE in Power Department an mawh puh ngam chhan hi Power Minister an zuam bîk vang niin an han sawi kawi leh ṭalh bawk si a, politics hi party dangte nena khelh aiin a chhungah a harsa zawk tihte rilruah a lo lang nghal chuai chuai a ni.
Lalremruata