UK-a daktawr hnathawh duhte tan

Mahni vei zawng hi han tlangaupui ve ngawt mai ila. Hei hi kan ram ṭhalaite tan, tuna daktawr zir mek, daktawr zir tum leh nu leh pa in fate daktawr zirtir tumte tan chona leh a ṭangkai takin tiin ka rawn ziak a ni e.
Mizoramah ngei Medical College kan nei ta hi a va lawmawm em!  Ka hriat sual loh chuan kumtin seat za a awm a, kum tin mi za dawn daktawr pass chhuak thar kan nei ṭhin dawn anih chu. Chutih rual chuan Mizoram chhungah hian daktawr hna hian min daih vek dawn lo tih chu a chiang sa a. A tam zawk chuan Zoram pawnah loh theih lovin hna zawnga kan feh chhuah a ngai ngei dawn a ni. Vairam khawlum lutuk a hnathawh ai chuan sapram lam hi rawn hawi ve chhin turin ka rawn sawm duh che u a ni.
Khawi ramah pawh daktawr zir tur chuan lehkhazir nasat a ngai a. Chutiang bawkin ZMC a zir thei chin chu Mizoramah pawh a thiam berte in ni a. Chuvang chuan in tum pawh hi a ruh viau ang tih a rin theih a ni. 
UK-ah hian Mizo daktawr kan nei ve ta nual a. An thawhna hmunah pawh an hming ṭhain, clinical lead te, regional lead te an ni fur hlawm. Mi inngaitlawm tak mai an nih avang hian an insawi duh lo mai mai a ni. UK-a daktawr hmun thuma ṭhena hmun khat lai mai hi UK pawn aṭanga graduate an ni a.  Daktawr indaih lohna hi a nasa reng a. Nikum pawh khan full time equivalent posts hnawh khah loh sangkua lai mai a awm a ni.(Source: The Telegraph) Brexit hnu phei hi chuan EU daktawr ten work visa an ngaih avangin an tan lokal a harsa ta a, India daktawr-te tan tun hma aiin chance a ṭha lehzual a ni. 
UK-a daktawr anga thawh dawn chuan General Medical Council (GMC) a in register a ngai a. Chumi ti thei tur chuan ramdang daktawr-te chuan an medical knowledge leh sapṭawng thiamna a ṭha tawk a ni tih fiahna a ngai a. Mi tam zawk tan chuan PLAB exam paltlang a ngai a. Hemi hrechiang duh chuan GMC website ah en mai tur a awm. Tin, PLAB exam lova luh dan pawh hi a awm nual a. Mahse postgraduate degree emaw a tlukpui neih a ngai tlangpui. India ramah pawh MRCP, MRCPCH, MRCS, MRCOG, etc a exam theih tawh a. A theih chuan hengte hi han pass hmasa ula. UK-a rawn chhuk hma pawhin hna a dil lawk theih a.  Keini daikil kara seilian takngial pawh kan luh thlak theih chuan ṭhangthar thluak ṭha zawk tan chuan a huphurh awm loh. 
UK in rawn thlen hunah chuan National Health Service (NHS) hnuaia Hospital pakhatah in thawk anga. Hei hi sawrkar hna ang ve deuh ber a ni a. Mahse, minister ten thu an va nei ve vak lo hle. Hman deuh tawh ah khan kan Prime Minister hlui David Cameron pawh Hospital ward a va tlawh a, a inchei dan kha Hospital dan zawm lovin kawr ban tlawn a ha a, amah leh a thuihhruaite ward daktawr in a hnawtchhuak vek. UK-a in rawn kal hunah in duhna specialty a training post tur kha in apply leh vat anga. Heta tan hian exam leh interview te a ngai leh ṭhin. MBBS i zawh hnua India rama i thawhna record fel tak neih a pawimawh, UK-a hna i zawm hunah i payscale a san phah thei ang.
Hlawh lam chu seniority leh darkar thawh tam dan a zir a ni anga. Specialty training lai pawh hian chhungkaw chawmna khawp chu an pe ang che u. Specialty training i zawh hnu chuan i duh leh Zoram lamah thiamna sang zawk nen i haw anga, i duh leh i awm hlen anga. Ṭhenkhat chu Australia, New Zealand leh Canada ah te an insawn leh bawk a.
Pawl angin UK Zofate kan ding ve a. Member 200 chuang kan awm a, kan inngaina in chhiatni leh ṭhatni ah pawh kan inṭawiawm ṭha hle ṭhin. Kan lo welcome em em dawn che u. Neitu chan chang takin in rawn awm anga, a neitu in ni mai ang. UK Zofate Thukhawchang tih magazine kan release thar a. A copy hi ZMC library ah a awm bakah Synod Bookroom, Baptist Book House leh lehkhabu dawr hrang hrangah lei theihin a awm. Hetah hian UK-a nurse hna kalphung,  British Army a lut duhte tana hriat tur, kan Sap missionary hun hnuhnung chanchin chhuichianna leh thudang ngaihnawm tak tak a awm a ni. UK-a lokal tum tan leh kan missionary-te chanchin ngaihven tan chuan chhiar ngei ngei chi a ni.
UK Zofate hian kan theih tawpin puih che u kan inhuam a. Rawn chhuk thla sup sup teh u. Nakin lawkah chuan UK-a Damdawi In corridor ah hian Mizo daktawr leh nurse te hi kan la inpel sup sup lovang tih tunge sawi thei? Kan contact person ber chu kan secretary Pu Lalrinawma Zadeng,  secretary@ukzofate.org  a ni e. chairman@ukzofate.org ah pawh contact theih kan ni e. 
Dr Thangura Zadeng, Chairman, UK Zofate