NGAIHSAK HLAWH LO THINGTLANG COLLEGE TE

Khawvel hmasawnna leh changkanna in a ken tel ni maw, a rethei, a hausa, a mawl leh a fing ber thlengin; khaw lian leh khaw te, phaitual leh thingtlanga chengten zirna kan ngaipawimawh a, neih thinglung khawngin tu leh fate tan tiin mahni phak tawk ṭheuh vah, kan khu ruai hlawm a nih tak ber hi maw! A mawh lo ve, Khawvel huapa ei-bar, khawsak phung ṭhang chak ber (top most competitive global economy) ram Singapore Prime Minister pawh an ram ṭhan chak em em chhan leh hlawhtlinna thuruk an zawh chuan chawp leh chilhin, “Zirna(education)” tiin a chhan kha maw. 

Kan ram dinhmun min zawt ve dawn ta se, engnge min zawh ang aw? Kan ram dinhmun an hriat chian viau chuan, ‘In ram (economy) hlawhchhamna chhan ber hi eng nge ni?’ an tih daih ka ring. Chu chu chhang dawn ta ila “Zirna - kai rual lo lutuk hi a ni” kan tih ang nge, “Sem policy - nuai khat/ nuai thum sem, etc.” kan uar vang zawk? kan ti ang? Nge, a pahnih hian? 

Kan ram hruaitute pawhin zirna an ngaihpawimawh thu hi an sawi chamchi a. An hun lai na na na chuan a changtu Minister te (Schhool Education leh Higher & Technical Education a mite) pawhin ṭan an la viau ṭhin. Chu tih rualin, hma kan sawn mawh hle si. Kan hotute  ṭan lakna hian awmzia a nei ta lo emaw ni chu le tih palh a awl ṭhin. 

Thil lawmawm deuh mai pakhat erawh chu, khawpui leh thingtlang college-te rualkhai zawka kal duhna avangin, tun hnaiah, zirtirtu(Assistant Professor) nghet atana an lakte chu Aizawl khawpui pawna College hrang hrangah  mamawhtute mamawh dan mila sem rual phawt ni se, tiha thutlukna an siam hi a ni. Minister ṭha leh chak tak kan neih vang a nih ngei ka ring.  A lehlamah, Sir Isaac Newton-an, “To every action, there is an equal and opposite reaction,” a tih ang deuh hlekin nghawng erawh chu a nei. A la nei zel dawn ni pawhin a lang. Chung zinga langsar tak pakhat chu ‘zirtirtu sawn chhuah an phal lo,… an dang…’ tih hi a ni. 

RUSA Scheme hnuaia zir­tirtu atana an lak leh mamawh hmanhmawhna avanga an lakchawp nawk nawk, zirtirtu la ṭhalai deuh, thiam tak tak si te kha, a ngheta lak an nih dawn chuan post ruakah ngei dah an ngai tawh si a, an lo thawh mekna college, theihtawp an lo chhuah tawhna kha an rilruah a lo bei nghet hman a, an zirlai-naupang te lahin an lo taneih hman tawh ṭhin bawk nen, chhuah san mai an harsat ṭhin a ni. A awm khawp mai. 

Zirtirtu, mahni thawhna zirlai nauten kan chhuak tur min ui ngawih ngawih a nih chuan thil lawmawm tak a ni a, a chhuanawm khawp mai, ‘chhuak thuai thuai se’ min ti ang tih hi hlauh zek zek tur zawk a ni. Chutih rualin, kan hotute thu awih phawt mai hi, zirlaite leh a nghawng mek college tan mai ni lo, kan ram pumpui kal zelna atan a pawimawh ngawih ngawih a ni tlat. Siamṭhatna hna thawh tak tak dawn chuan, vawikhata vawikhat chu rik laih hi a awm lo thei lo. Chu chu sut tlang ngei ngei tur a ni. Sut tlang loh chuan ‘a zual zawpui vailen hlo’ tih ang kha a ni mai. Tihleh dawn pawhin a hma aiin a har sawta, siam ṭhat a khirh zual sauh ṭhin.

Tlem lai deuh khan, kan ram hruaitute zingah ‘a ngaihna hria’ tih ṭawngkam hi a lar viau ṭhin a, dik kan ti a, kan lawm viau ṭhin a nih kha. Tunah erawh chuan, a ngaihna hriat ringawt a tawk tawh lo. A taka kalpui a ngai tawh. Thil, a ṭha zawnga kalpui tak tak tur erawh chuan huaisen a ngai khawp mai. Tun hma hlek khan, kan H&TE hotuten ‘Zirtirtu sem rual/ in kal thelh/inthlak kual dan (Teacher- rationalization/ Teacher- exchange Programme)’ ṭha deuh mai an rawn duang chhuak a, a lawmawm tawh teh reng nen, tute emaw he policy duh lohtu emaw, awm hmun sawn huphurhtu emaw te boruak rit tawn tlang huphurh vang nimaw, an titlang ngam ta lova, a uiawm khawp mai. 

College-a thawktu zawng zawng deuh thaw ten khaw­puia luh an duh vek a, luh hram dan tur an dap char char a, post ruak - pension hnai leh vanduaina (thihna) tawk an awm hlek chuan chung mite chhuahsan hmun ruak chu chan ngei tumin an kher ngar ngara, inchuh buai, inhmu thiamlohte pawh an awm hial ṭhin. Heng te avang hian, khawpui college-ah chuan post ruak a awm hman meuh lo. An chhuah san college, a bikin, thingtlang college-a post ruak te erawh chuan ngaihsak an hlawh nep khawp mai. Post ruak an neih deuh reng ṭhin. 

Khawpui college-a thawk, thingtlang college-a sawn chhuah te chuan hremna tawk ang hiala an inngaih laiin, thingtlang aṭanga khawpui lut thei te erawh chu mi thiltithei, sawipuitu nei ṭha, promotion hmu ta ang hiala ngaih an ni thung. Zirna hi ram hmasawnna hnuk pawimawh tak a ni tih hi ram changkang apiangin an hria. France President hlui, Francois Mitterrand-a pawh kha mahni thutiama ding nghet, zirna ngaipawimawh mi tak a ni. President-a thlan nawn a nih dawn khan, a campaign-na ah ‘Zirna ka ngai pawimawh ber ang’ a ti a,  a lo tlin leh khan a thutiam chu bawhzuiin, Education Minister chu Prime Minister dawttuah a dah nghal hmiah. Changkang awm reng an lo ni e. 

Zirna siam ṭhat nana kan ram mamawh ber ni a ka hriat tak chu: Ram tana ṭha turah chuan, kan ram roreltute hian, tlak phah ṭhak dawn pawh ni se, dodalna nasa tak karah pawh, huaisen takin kalpui hmiah hmiah rawh se. Ram an hmangaih tak zet chuan an la lawm zawk tho ang. NGO/ Zirlai Pawl,etc. te pawhin chutiang kawngah chuan sawrkar thlawpin an kut tih chak tum bawk ila, kan thlawp theih ngang loh a nih pawhin, dodal lo tal ila, hma kan va sawn rua e. 

Dr. Lalsiamhnuna