NATIONAL FLAG

Tun hnaiah thingtlang khaw pakhatin National Flag a letlinga an zar palh thu hla-ah sorkarah ngaih­dam an dilna social media-ah kan chhiarin kan lo hmu a. Hetianga thil an hriat tawk lohna avanga ngaihdam an dil hi an fakawm ka ti a. National flag leh India ram zahawmna an vawnna kawngah mel lung pawimawh tak phuntute an niin ka hria.

National flag hi a zar dan tur fel tak a awm a. Hei hi sorkarin a ngaih urhsun avangin India hmeichhe tennis star Sania Mirza pawhin national flag a  hman danah sawisel a lo hlawh tawh a. Midang ṭhenkhat pawh Sania ang deuha zilhna tawk an awm thu phai lam chanchin bu lianah ka chhiar tawh nghe nghe a.Chutih laiin, khawvel ram dangte'n zalen taka an hnam puanzar an hman dan hian ram leh hnam a chawi lar ve mek bawk a. Hei vang hi nge ni ang India flag hman dan pawh tih zalen hret ni tain ka hria.

National flag hi a zarna tur leh dahna tur awmsa bakah Mizoramah pawh ram leh hnam ni pawimawhah kan zar chhuak ve ṭhin a. Tun hnai Jan 26,Republic Day khan ṭhiante tlawhin ka leng chhuak a. Chuta ka thil hmuh chu mak ka ti viau mai. Sorkar office , mahnia building nei ngei ngeite pawh an office building-a national flag  inzar tam ber chu a hran­pa-a flag zarna siam lo,  duh dah taka zar a ni hlawm a. Hmun ṭhenkhatah phei chuan an 'tar' satliah ve mai mai a niin a ngaih theih. Hmawlh ni mai awm tak, mau bunga tarte pawh an awm.

Mahnia building nei sorkar deptt. te hi chuan an building  hmalam remchang-ah hnampuan zar tarna tur hrim hrim hi siamin flag ngul phunna tur siamsa diam nei vek se la, chutah chauh chuan flag chu ṭha takin tar ṭhin ni se la tiin rawtna ka rawn siam ve duh a. Hetianga felfai taka national flag kan zar hian India ram leh Mizoram zahawmna leh mawina vawnna tur a ni ngei ang tih ka ring a. 

Tin, sorkar buil­ding sa thar tur zawng zawngte pawh, senso tlemtea siam theih flag tarna tur an building plan-ah dah tur leh drawing-ah pawh ziak tel nghal zel tura hriattir ni bawk se la. Rawtna ka rawn siam ang hian Mizo­rama sorkar hnaa hotulu ber, kan chief secretary pawh a ṭul anga  hma la turin ka ngen nghal bawk a ni e. 

C. Lal Thlamuana