Social activities leh ṭhalaite

Social activities han tih chuan kohhran leh khawtlang thila kan inhmanna te tihna hi a ni mai awm e. Mizo ṭhalai thatchhiatna kawnga hruaitu lian ber chu khawtlang leh kohhran thil tam lutuk hi a ni. Kohhran leh khawtlanga lar laklawh hi a hlauawm a, mi tam tak hma hun tichhetu a ni. 

Tlangval pakhat chu lehkha zir sang peih lo, inhlawh peih tak tak bawk si lo, inhlawh peih loh chhuanlam tur kohhran leh vantlang programmee a awm reng a, inchhung­khurah chuan a zan mut leh a chhun mut bak an chang meuh lo. A kar tluan hun chu a chhungte tan ni loin, kohhran leh khawtlang a pe a ni. 

Amah lah chu a hahdam avangin a thau telh telh a, mah se a hmuihmui mehna man takngial pawh a thawk chhuak lo. Chu tlangval chu nupui neih a lo hun ta a, a hun vang ringawtin nupui a nei ta; engtin nge an awm chhunzawm zel ang? Hei hi tunlai Mizo ṭhalai tam tak ṭhan­mawh bawk a ni. Ṭhalaite hian Pathian hi kan hre tur a ni a, Pathian mi hriat ni tur khawpa Pathian lam ṭang kan nih a ngai. Amaherawhchu, kohhran leh khaw­tlangin kan hun a luah hnem lutuk erawh hi chu zawi zawia  hnam ralna tling a ni. Tunlai hian mimal tam zawk chuan an hnuaia thawk turin kohhran leh khawtlanga mi phusa tak an la duh tawh lo. Kohhran leh khawtlang thil chhuanlam kan ngah lutuk hian kan hna a tichhe ṭhin. 

Kan mimal nun leh chhungkaw nun, khawtlang nun te hi pawl leh kohhran kaltlanga siam ṭhat kan tum ṭhin, hemi avang hian kohhran leh pawl thiltih pawh hi a tam phah reng a ni. Mimal, chhungkua leh khawtlang nun hi a pawl anga siam ṭhat chi a ni lo a, a mimal leh chhungkua ang zawnga siam tur a ni. Mi tin hian kan zirlai te, kan hna te hi ṭha taka kan thawh ṭheuh a, kan inchhungkhur tana hun kan hman tam phawt chuan a hranpaa khawtlang nun siam ṭhat a ngai tawh lo ang. 

Thatchhiat chhuan­lama kohhran leh khawtlang thil hman hian kohhran leh khawtlang hi a tihzahawm loh phah a, heng rawngbawlna pawimawh tak pahnih te lemchanna hmunah a chhuah phah ṭhin. Kohhran leh khaw­tlang thil hi that­chhiat chhuanlam atana remchang a nih avangin kohhran leh khawtlang thil hi tam lutuk tawh lo se, mitin hi mahni chhungkua-ah awm tam ila, chhungkua uap hneh ila kohhran ngelnghet leh khawtlang ṭha kan lo nei thei zawk ang. 

Ṭhalaite hian hna i thawk nasa ang u, ṭhalai zirlaite pawh hian nasa zawkin an zirlai bei rawh se. Kohhran leh khaw­tlangah chuan a khawtlang leh koh­hran buai lohna tawk tura active tur sawrkar hnathawk kan ngah! Keini'n kan hman chang leh intih­thawven pahin kan lo pui zeuh zeuh ang; tichuan hnathawh nan leh chhungkaw tan hun kan ngah ang a, kan hnam a changkang ang. Mizo ṭhalaite kan socialize nasat loh hun hun hi kan changkan hun a ni e. 
 

Ramengi Pa