MIZORAM LEGISLATIVE ASSEMBLY BUDGET SESSION 2021 THLIRLETNA TAWI

Mizoram Assembly Budget Session 2021 ngaihnawm tak mai kha chhungkua te'n kan lo thlirin, kan lo ngaithla ve ṭhin a. Kan ram kalphung ṭha tih tam tak a awmin, ṭha tih loh pawh a tam hle mai. A bik takin MNF sorkarna hnuaiah hian Sorkar Official te'n Assembly Session zawhna chhanna hi an nei mumal lo riauin a lang. Chhánna awm tho si, mahse awmze mumal lo, zawh belh leh ngaihna awm lo khawpa chhánna zahawm lo leh bùng a awm nualin a lang. Mahse, chutih karah Budget Session a nih angin Finance Minister Pu Zoramthanga'n Mizoram tan chéng vbc. 111,48.89 lái mai budget a pharh tih hi chu sawi lang hmasa ve phawt ang. 

Session neih chhungin zawhna chhanna hi nitin kan lo bihin, uluk deuhin kan lo zir chiang ve ṭhin a. Kan ram kalphung, tih tur tih loh, tih loh tur tih pawh a tamin a lang. Tin, sum leh pai inenkawl dan a felfai lo hlein a hriat a, COVID-19 chu puhmawh tur ting chu awm mahse, sum ruahman dan a mumal lo ém ém niin a hriat a ni. Kan Chief Minister zahawm tak thusawi, a thutiam tawh, zawhna chhánna, a awmze bo ṭhaka chhán nia ngaih theih, emaw tih luih anga lang thei a awm bawk a ni. Pu Zodintluanga, Congress Legislature Party Leader, zawhna chhánna aṭanga a lan danin, MNF sorkar kum thumna kal mekah hian kawng chhawng tur ban pakhat mah phun a la awm lo a ni. Starred Question 77 Zawhna (a) naah chuan, "December 28, 2018 a Chief Minister Pu Zoramthanga hova kawng chhawng tur an en kha a sak bul ṭan a ni tawh em?" tih a ni a. March 3, 2021 chhànnaâ a lan dan chuan, "Ṭan a la ni lo," tih a ni. 

Zawhna (b) naah chuan, "Aizawl khawpui chhung kawng chhawng siam tumna lai, hmalak tawh dan, siam zawh hun tur leh khawi laiah te nge ṭan a nih tawh?" tih zawhna chhánna chu, "Aizawl khawpui chhung Bawngkawn Junction leh Vaivakawn Junction-ah te kawng chhawng (flyover) siam tum a ni. Tunah hian feasi­bility study consultant ten an thawk mek a. DPR te peih fel a nih hma chuan thawh zawh hun tur pawh hi sawi theih a la ni lo," tih a ni. Hemi zawhna chhánna aṭang chiah hian kawng chhawng (flyover) tih hi an rawn belh ta zel a ni. 

Ka sawi duh pawimawh lai tak chu, Congress Legislature Party Leader zawhna awmzia nia mipui ina kan rin dan chuan, 2018 MLA Election dawn a Traffic Jam free a awm theihna atana MNF Campaign-na au hla, kan rilrua an lo tuh dan angin motor kawng chhawng an siam tum zawhna niin a lang a. A chunga zawhna pahnih ka tarlan bak phei hi chu Flyover tia chhánna a ni zel tawh. A zawttu hian kawng chhawng a ti a, a chhangtuten, Flyover tiin an rawn belh sak zel a. Flyover Bridge chu kawng chhawng chikhat chu a ni phawt mai. Mahse, kan rilrua an lo tuh tawh dànah dawt sawi anga lan hreh si. Mihring kea kalna Flyover bridge-a an rawn chhuah daih hi engemaw a awmzia ni? Min hnial duh ṭalh in la awm tákin, he Flyover an sawi hi mihring kea kalna tur bakin an puitlin lo ang tih a rin theih. A tira sawi chiang duh si lo. Mipui bum tum ràn Policy an la hmang reng mai hi kan ngaihtuah chian a hun tak zet e. Ka hringchan puite u, bumin awm tawh lo ang u.

A dawt lehah chuan, Pu Lalrindika Ralte, Hachhek bialtu MLA zawhna, Starred question 174, GAD changtu Chief Minister a zawhna chu, "Kum 2019 Chapchar kút hawnna a Chief Minister zahawm takin Pathianin rem a tih chuan May (2019) thla aṭang chuan AR Lammual hi mizo mipuite ta a nih tur thu a sawi kha, tunah hian AR Lammual hi mizo ta a ni tawh em?" tih chu, March 12, 2021 chhánnaâ a lan dan chuan, "AR Lammual hi Mizo mipuite ta a la ni lo," tih a ni bawk. 

He thil phei hi chu May (2019) pawh ni mai tawh lo. February, 2021 chhungin Assam Rifles-te hi Zokhawsangah an chhuah fel hman vek a rin thu Chief Minister, Pu Zoramthanga'n AMC Campaign Kick-off, Ramhluna an neih ṭumin a sawi leh tawh nghe nghe a nih kha. A tak hmuh tur a awm lohzia chhánna a chungah kan hmuh khi. Tin, Mizorama sipai dangte pawh úm chhuah zel an tum thu a sawi zui bawk a. A sawi anga thil engkim thleng tur chu nise AR te hian Aizawl an chhuahsan vek tawhin a rinawm a. Mahse, sorkar laipuia MHA te thu a nih hmel mah zawkin a lang. Zokhawsanga an awmna tur lamah chuan a rang lamin insawn chhuak se tih hi Mizoram mipui duhdan a ni a. Mahse, dáwt hmanga, Vote zawnna atan chauha mipui min bumna atana an hmang leh ṭhin hi a hneawm zozai tawh a. A hunah chuan MHA lamin thu pèin, an la chhuak tho tho ang tih hi mipuite'n ring tawh zawk ang u.

Mizoram Assembly Budget Session 2021 tawitea thlirlét ka ni bawk a. A hmawr bawkna atan chuan he thil langsar leh duhawm lo tak hi ka'n hmang ang e. Assembly House-a thu inchuh te, inhnial rap rap te hi thil thleng ngei tura ngaih a ni. A chhan chu Mizoram ṭhatna tur a nih dawn phawt chuan tiin, a lo thlir dan tawk kan thiam ṭhin. Mahse, House pawn thleng thlenga ṭawngkam mawi lo tak taka in úmzui hi a zahawm lovin, ram hruaitu, Minister tih atana thil zahthlak tawpkhawk niin a lang. 

Ngaihdam dil leh ngaia thusawi ai chuan, ngawih ngam mai hi a finthlak zawk. Kan ngaihsàn em em khawthlang lam, sáp ho pawhin, "Silent is Gold" an lo tih ṭhin kha. Sawi duah lovin keipawh insúm daih ang. A tawp ber atan chuan, "In zinga suàl nei lo apiangin amah chu lungin déng hmasa rawh se." (Johana 8:7)

David Zochhuanmawia (Vida Hrahsel Saza)