MP inthlan chhinchhiahtlak

Tun ṭuma Mizo­rama kan MP inthlang chu a chhinchhiahtlak a, Mizo Kristian tan lawmna tur thil thar tam tak a awm a ni. Ṭum danga party mite inthlanga party mite intam siak ang kha a nih lohna chen a awm a, political debate awmze nei tak takte pawh kan hmu ve 
ṭan ta. A tawp result erawh ṭum dang ang bawkin Mizorama kan mikhualten kan MP tur min thlan sak leh ta niin a sawi theih. 

MNF candidate Pu C Lalrosanga'n Congress leh ZPM-in an thlawp independent candidate Pu Lal­nghing­lova Hmar (Tetea Hmar) chu vote 8,140 in a hneh. He inthlan chanchin tingaihnawmtu chu Pu TBC Lalvenchhunga leh Pu Lalhriatrenga Chhangte te an ni a, anni pahnih hian vote 10,000 an hmu tling ve ve a, BJP aiawha ding Pu Nirupam Chakma chu pathumna niin vote 28,707 a hmu a ni.

Mizorama MP inthlan hi kan en chuan kil hniha inbeihna a ni ṭhin a, a pathumna hi awm ve mah se tihtham a ni ngai mang lo. Tun ṭuma inthlanah kha chuan a pathumna kha an lian ta khawp mai a, pathumna tia sawi theih chu BJP + PRISM + Hriata kha an ni. Pu Rosanga'n vote 2,24,286 a hmu a, Pu Tetea vote hmuh zat chu 2,16,146 a ni; anni pahnih inthlauhna hi chu vote 8,140 chauh a ni. 

Tichuan, a pathum­na anga kan sawi vote pathum belhkhawm - Nirupam Chakma (BJP) vote 28,707, PRISM vote 13,323 leh Hriata vote 12,675 chu 54,705 a ni ta daih mai a, hei hi chu hrawl tham tak a ni. MP inthlan dangah chuan ruling party hne deuh tawhten candidate pakhat zawkah an vote an vawm bei ṭhin a, tun ṭum chu ruling party ni se ninna hun a la ni lova, thil an la tiṭan dawn leih leih a, MLA inthlana an tlin lawmna khuang beng ri pawh a la reh fel lo; chuvangin ruling ninna a la awm lo. 

Ruling duh lo lamin an vote turin mi pali an rawn awm ta ṭhawih mai a (BJP hi NDA tho an nih avangin pathum pawhin a sawi theih), hei tak hi he inthlan boruak ti ngaihnawmtu chu a ni ta a ni. MNF duh lovin an vote theih turin candidate ṭha ṭhiau pathum kha an awm ta a, lehkhathiam, la ṭhalai leh hawi zau tak an ni bawk si a, mipui tan pawh duhthlan tur a tam ta a ni.

Kan voting beha­viour enin Mizo mipui nawlpui (a bikin khawpui) lamah chuan candidate milin vote kan thlak ṭan niin a sawi theih. Khawpui lianah ruling an chak lo fai deuh vek a, Aizawl leh Lunglei khawpuiah chuan MNF hi an chak lo hle a, Kolasib leh Serchhip-ah pawh an chak lo. Champhai, Lawngtlai, Siaha leh Mamit-ah pawh a town area chhungah chuan ruling lam hi an sang vak chuang lo an la ti cheu bawk - chu miin a entir chu candidate milin vote kan thlak a ni. 

Thingtlangah erawh chuan, "Ruling nge nge/ ruling lo chu" tia Chief Minister hova Minister-te feh chhuakin awmzia a la nei. Kan ram mutan ni kumkhua tur chu Chakma area hi a ni. Mizo hlang awmna lama vote hmu tam tam hi tlingah kan puang thei lova, Chakma vote hi a hlawm hluk chhung chu Mizo hlang awmna lamin kan duh zawk ni lo, kan tum loh zawk an tling fo lovang tih a sawi theih loh. 

Lalmuanpuia