Taxi hi traffic flow timuangtu an ni
Aizawl khawpuiah traffic lamah harsatna namen lo a thleng mek a, sorkar pawhin thla thar aṭangin lirthei intlanchhawk a huaihawt leh dawn a, hei hian eng ang takin nge kawngro a sut dawn hriat a ni lo a, mahse awmzia tlem tal chuan a neih ngei beisei phawt mai teh ang.
Aizawl khawpui kawngpui a zim tawh tehreng nen kawngpui sir zau deuh lai apiangah lirthei an park tluan zak a ni ber mai a, a ṭhen chu an awmna veng local council-in parking fee an lak leh AMC-in parking an lakna a ni. Kawngpui tlema zau deuhah chuan AMC hian parking fee lak nan an chuk chat zel mai si a, kan road tax chawi tawhah parking fee kan chawi nawn leh a ni ber a, kum 15 road tax kan peknaah kan chawi nawn leh zel tihna a nih ber chu.
Kawngpuiah lirthei kan inzui duah duah a, lirthei tam zawk chu switch off theih loh chi a nih laiin taxi-te chuan switch off hlirin kawng chhukah an tlan a ni ber a, an ni hian traffic kaltluang ṭha lai an tibuai a, traffic flow a timuang a ni. Aizawl Temple - Vaivakawn inkarte hi taxi hian min control em em a, han tlanpel dawn ila, pelh hleihtheih loh khawpin kawng a zim bawk si, a mangangthlak ṭhin khawp mai.
Upper bazar aṭanga Zarkawt panna lam kawng chhuk hlekah pawh taxi-te hian switch an off ṭhin avangin traffic flow a ti khaihlak fo a, traffic police an awm loh phei chuan an duh duhin an hnunga mite min inzui tir a ni ber. Passenger phur chi taxi ect. angte hi switch off-a tlan a thiang lo tih hi taxi khalhtu tam zawk hi chuan an hre lo a nih hmel a, zirtirna pek ngei ni se.
Taxi khalhtu tam zawk chuan passenger an hmuh chuan an hnunga anmahni zuitute ngaihtuah lek loin an ding chawt mai a, a piah deuha kawng zau lai pan phawta ding an awm laiin a mawl fal an la tam khawp mai. Tunlaia ngaihhnathiam awm lohna (no tollerance week) hman mek hi lirthei khalhtu inthlahdahte siamṭhatna hun atan hmang hlauh se a lawmawm khawp ang.
Taxi driver te hi an mawl vek lo a, hawihhawm leh dan pawisa tak tak an awm, Mizo ṭawng thiam famkim lo leh ṭawng pai apiangin dan pawisak nachang pawh an hre lo. Kan kawngin a zir loh em avang hian lirthei khalhtute hian dan leh hrai zawm ṭha i la. Midang lirthei khalh vete ngaichang thiam ila khawpui nuam kan siam a ni mai dawn a ni. Kan traffic police fel leh zaidam tak takte hi zah thiam a pawimawh em em bawk a ni.
Lal Rinmawia