No tolerance week a hlawhtling

Tunlai hian Transport department leh Traffic police ṭangkawpin lirthei document leh licence ect. vawng ṭha lote enfiah hna thawkin no tolerance week an hmang mek a. Aizawl khawpui traffic jam nasat lai ber pawhin lirthei a tlan tlem phah em em a, traffic jam a awm meuh lo a, a hlawhtlinna pakhat chu a ni ve ang. 

Eng vanga heti teh duaka traffic thawl em em ta nge a nih kan tih chuan document fel lo te, licence nei mumal lote leh fitness nei mumal lo an tam vang a ni tih a hriat mai. Hetiang hi thla tin nikhat emaw han ti thei se sorkarah pawh chhiah a luh ṭhat phah ngei ang a, lirthei chetsualna pawh a tlem leh zual ang. 

Dan hi zawm tura duan a ni a, a duangtu an awm ang bawkin a zawmtu tur kan awm a, dan hi awm lose chu mihring khawsak ngaihna a awm lo. Tuna inngaihhnathiam loh hun an siam a, lirthei an check pawh hi dan a ni a, dan pawisa loa palzut an man a, pawisa an chawitir pawh hi thil dik tak a ni. Hei hian dan pawisak inzirtirna thui tak a kawk bawk a ni. 

Tuna traffic jam a reh deuh duak pawh hi dan pawisa lo tam tak an awm vang a ni tih chiang takin a lang. Hei tak hi sorkar pawhin a tih tur a ti a ni tih a lang a, dan pawisa lo lakah na deuh ṭhek ṭhawka sorkar a che hi thil ṭha tak a ni. Eng party sorkar (ministry) pawh ni rawh se, dan dik taka ro a rel chuan dan pawisa mite chuan kan thlawp tlat zel dawn a ni. 

Sorkar kan tih hian ministry ai mahin a enkawltu department hi a ni leh zual a, department tinin an tih tur dik taka an tih hian kan state pum tan leh mipui tan a nuam em em a ni. Tuna traffic police leh Transport department ṭangkawpin licence leh document an check a, an lirthei a fit ṭha tawk em tih an enfiah a; document fel lo leh licence nei mumal lo an chawitir hi a ṭha thlawt a ni. 

Melissa Pa