VAIHLO LEH CHUAP HRISELNA
May ni 31 hi kum tinin World Health Organisation (WHO) chuan vaihlo dona ni World No Tobacco Day (WNTD) atan a hmang ṭhin a, hemi ni denchhen hian thupui hrang hrang neiin vaihlo ṭhatlohna thu tlangau pui ṭhin a ni. Kumin 2019 pawh hian “Tobacco and Lung Health (Vaihlo leh Chuap hriselna)” tih thupui hmangin vaihlo dona khawvel pumah neih a ni a, he thupui hmang hian vaihlo hmanin kan taksa peng pawimawh tak chuap hriselna a nghawng dan han tarlang ila.
Harsatna thlentu vaihlo
Vaihlo-ah hian Chemical hlauhawm chi hrang hrang 7,000 chuang a awm a, heng zinga 80 aia tam mah te chu cancer thlen theitu an ni. Heng vaihlo zuk leh hmuam chi hrang hrang - zuk chi: zozial, cigarettes, churut, biri etc., bakah, hmuam chi: tuibur, sahdah, gutkha (shikhar, tiranga, talab etc) te hi hman dan chi hrang hrang ni mahse, taksa tana a hlauhawm dan erawh chu a inang vek. Heng vaihlo zuk leh hmuam hman hian mihring taksa-ah natna a thlen nasa a, chung natnate enkawlna atan chuan sum tam tak sen a ngai ṭhin. Hei hian chhungkaw tam takah harsatna nasa tak a thlen mek a ni.
Taksa khawl pawimawh chuap
Mihring taksa khawl pawimawh em em chuap hi awm chhung dinglam leh vei lama awm a ni a, taksa a boruak kan thawkluh te lo thlifimtu a ni. Boruak ṭha (oxygen) te thisenah a lo sem darh a, boruak chhia (Carbon Dioxide) te chu a lo paih ṭhin a ni. Nunna atan a pawimawh em em boruak taksa a la lut turin chuap ṭha tak neih a ngai a, chung boruakte chu ṭha taka lo thlifima lo semdarh tur chuan chuap hi a hrisel ṭhat reng a ngai a ni.
Chuap natna thlentu vaihlo
Miin meizial a zuk nasat emaw vaihlo eng chi pawh a hman nasat chuan vaihlo a tur awm te kha chuapah a inchhek khawl a, chu chuan natna hrik a siam theih avangin Pneumonia leh chuap TB te a vei phah ṭhin a. Hei bakah hian, vaihlo khu hian bawlhhlawh dum tak (tar), Mizo pa in-a rapchung ung, inting kan tih ang chi thil bawlhhlawh chuapah a chhekkhawl ṭhin. Chungte chuan chuap hnathawh a tibuaiin, a fan theih tur anga fan tir thei lovin, thawhah te a siam a, a lo rei chuan chuap ro (emphysema) bakah chuap cancer a thlen phah ṭhin.
Khawvel puma chuap cancer hmun thuma ṭhena hmun hnih hi vaihlo hman vanga thleng a ni. Tin, vaihlo hman nasat avang hian chuap natna benvawn, Chronic Obstructive Pulmonary Disease (COPD) kan tih - thawk lama harsatna, thawhah, khuh benvawn te hi a thleng thei bawk a, hetiang natna hi a bik takin naupangte nih lai aṭanga meizu ṭhin te-ah vei theihna dinhmun a sang bik a ni.
Vaihlo leh TB
TB (Tuberculosis) vei mekten vaihlo zuk leh hmuam an hman reng chuan TB damdawi taksa-ah a thawk ṭha thei lova, TB-in chuap a tihchhiat theihna dinhmun a sangin chuap hnathawh a ti chak lo thei hle. Chu chuan thawkna lamah harsatna a siam ṭhin avangin thihna hial a thleng thei a ni. Vaihlo hmang nasate-ah TB vei theihna dinhmun a san bik ṭhin avang leh TB natna vei mekte tan vaihlo hman hi a hlauhawm em avangin, vaihlo leh TB natna dona kawngah hian National Tobacco Control Programme (NTCP) leh, Revised National TB Control Programme (RNTCP) te ṭang kawpin ram pumah campaign kalpui mek a ni.
Mi dang meizuk khu pawh thihna
Midangte meizuk khu (secondhand smoke) hip luh avang hian meizu ve ngai lote pawhin a zu ṭhinte tuar ang natna hrang hrangte an tuar phah thei a, chu chuan thihna hial pawh a thlen thei a ni. Secondhand smoke hi puitlingte tan pawh a hlauhawm em em laiin naupangte tan phei chuan a hlauhawm leh zual a, kum 12 chin chunglamte hian minute khat chhunga thawk kan lak zat hi vawi 12-20 vel a nih laiin, nausen kum 1 chin hnuai lamten minute khatah 30-40, kum 1-2 ten 25-35, kum 2-5 ten 25-30 vel thawk la ang an ni.
Naupangte bula meizial zuk khuk a nih hian kan tarlan tak ang khian, thawk an lak ran bik avangin nasa takin meizial khu, tur hlauhawm tak kha an lo hip lut ṭhin a, chu chuan heng natna hrang hrang - chuap ṭha lo, thawhhah, khuh benvawn (asthma), pneumonia, bronchritis, TB leh adangte hi naupangte-ah a thlen ṭhin a ni. Midangte meizuk khu in thawkna lam natna a thlen avang hian khawvel pumah naupang 1,65,000 vel te chu kum 5 an tlin hma in an boral ṭhin a ni. (WHO) In chhung leh puipunna hmuna meizuk simin, vaihlo zuk leh hmuam ṭhat lohna a tam thei ang ber zirtirna kalpui ila. Vaihlo khuahkhirhna dan te a nihna ang taka kenkawh a nih theih nan ṭan la ang u. Tichuan taksa hriselna kawngah hma kan sawn ngei ang. Kumin, 31st May 2019 ‘World No Tobacco Day’ a kan thupui hre reng chung hian, kan taksa khawl pawimawh em em kan chuap hi duat takin enkawl ila, a tichhe theitu vaihlo hi i do tlang ṭheuh ang u.
Dr. Jane R. Ralte, State Nodal Officer, National Tobacco Control Programme