Ram leh hnam tana hman tlak

Ram leh hnam leh khawtlang tana mi hman tlak, innghahna tlak tak mi tam tak an awm laiin, ram leh hnam, khawtlang chu sawi loh, chhungkaw tan pawha ṭangkai lo ve tak tak, chhungkaw chawkbuaitu leh ti mangang a, nu leh pa, u leh nau, chhung leh khatte tana buaipui awm zet zet hi an (kan) awm ṭeuh bawk a. Hengho vang hian hma kan sawn thei lo a ni. 

Mi ropui, mite ngaihsan leh chawi­mawi phu kan ni vek thei lo a, chuti ang chu ni mah se, kan zavai mai hian kan duh a, kan tum a nih phawt chuan kan theihna leh thiamna, kan phak tawk leh tlin tawk a zirin eng ti zawng emaw tak chuan mi hman tlak kan ni thei vek a ni. 

Kan tisa chakna leh duhna kan dah pawimawh lutuk vangin hauh ngai leh zilh ngaiin kan awm ta ṭhin hi a lo ni, mite tana harsatna thlena siamsaktute kan lo ni fo mai bawk. Kan khawtlangah sualna leh ruihhlo chi hrang hrangten bu an khuar chhan mi awm ṭha duh lote vang a ni a, kan rilru puthmang kan siam ṭha lo a nih chuan ram tana a chhe lam zawnga buaipui ngai tur hi mi tam tak kan la awm. Hman tlak ni tura rilru kan siam a, kan put a pawimawh hle. 

Ram leh hnam, khawtlang leh chhung­kaw tana mi hman tlak, mi ṭangkai, chhawr tlak ni tur hian dinhmun pangngai taka din a, sum leh pai ngah kher a ṭul lo; mi fing tak leh lehkhathiam tak nih kher lah a ṭul hek lo. A pawimawh ber chu rilru dik pu mi nih a, ruihhlo laka fihlim a, kohhran tana mi hman tlak nih hmasak hi a ni. 

Ṭhalaite hi kawng engkima mi hman tlak leh mi tangkai kan nih theih nan chuan mahni sakhua ngaihsak mi, kohhran tana mi hman tlak kan nih hmasak a ngai. Kan politician tam tak hi an lawina kohhrana rawngbawltu leh khawtlanga mi pawimawh an ni deuh fur. Kohhran belh tlat hi mi hmantlak nihna pawimawh tak pakhat a ni. 

Kohhran tana mi hman tlak chu khawtlanga tlawm­ngai pawlah an hman tlak a, ram leh hnam tan mi chenfakawm an ni deuh zel. Mahni sakhua leh kohhran pawh ngai pawimawh lo, bel lo mi te chu khawtlang leh ram tan inhmang ve viau mah se mi chenfakawm tak an ni mawh khawp mai. 

He zoram hian ram leh hnam tana mi hnawksak leh buaipui ngai a mamawh lo a, ram leh hnam, khawtlang tana mi hman tlak leh mi ṭangkai, he ram hmangaihtu hi a mamawh tih hria ang u. Ram leh hnam hmelma nih tum lo ila, khawtlang tana buaipuiawm leh buaipui ngai ni lo ila, khawtlangah buaina leh manganna siamtu ni lo ila; mi ṭangkai nih i tum zawk ang u. He ram hian hmelma a mamawh lo a, kan theih tawk zawn aṭang ṭheuhin ram leh hnam, khawtlang tana mi ṭangkai nih i tum 
ṭheuh ang u. 

Tin, ram leh hnam, khawtlang tana mi ṭangkai tak kan ni thei lo a nih paw’n mahni intodelh hram hram ila, mi hnawksak leh mi chimawm i ni lo hram ang u khai. 

Nawlchunga Chinjah Meisatla, Siaha