ZOṬAWNG KAN HMAN LÂR DIK SI LO ṬHENKHATTE

Ka ngaihmawh êm êm, ṭhenkhat tân eng tham mah ni lo anga lang, kei atân erawh rilru chhûng ril leng lo khawp hiala lian leh lawi si chu kan bialnute leh bialpate, kan nupuite leh pasalte kan koh dân dik lo lutuk hi a ni.

Thil chîn ṭhante, hman ṭhante hi a dik sa  anga ngaih mai a awl hle a, chîk taka a dik leh dik loh zawn chhuah lam hi kan tuipui vak lêm lo nge, midangte rilru hliam kan hlauh vâng zâwk? Eng­pawh ni se, Zoṭawng kan hman lâr te zingah dik si lo langsâr si te a nih avângin en liam mai mai chi a ni lo.

Pasal ten mahni nupuite hi 'ka nupui' tih mai tûrah 'kan nu' kan ti ṭhîn a, hei hi Zoṭawng kan hman ṭhinte zînga dik lo hulhual a ni. Kan nupuite hi 'kan nu' kan tih si chuan min hringtu nu hi engtinnge kan koh tâk ang? Kan nupuite hi 'ka nupui' tih mai a tâwk. Min hringtu nu hi 'ka/kan nu' tih tûr a ni. Tin, nupui ten mahni pasalte hi 'ka pasal' tih mai tûr a ni, 'kan pa' tih a ṭûl lo. Nu-i emaw, Pa-a emaw tia inkoh tawn erawh a pawina a awm lo. 

Mipa bialnu nei ṭhenkhatten kan bialnute koh duat nân 'kan nu' kan ti tho mai a. Kan bialnute hi 'kan nu' an ni lo, mipain ngaihzâwng a neih chuan, chu a ngaihzâwnga chu a bialnu a nih avângin, 'ka bialnu' tih mai a tâwk. Tin, hmeichhe bialpa nei pawhin a ngaihzâwnga chu a bialpa a nih avângin 'ka bialpa' tih mai a tâwk. 'Kan pa' tih kual duah a ṭûl lo. 'Kan nu' leh 'kan pa' te chu min hringtute hi an ni. 

Engpawh ni se, kan ṭawngkam hman dik loh te ngaia kan neih avânga dika ngai mai lovin, a dik apiang i hmang uar thar zêl ang u. 

Centenary C. Lalzahawma