LAST MINUTE THLENGIN MPF ṬANG FAN FAN

April ni 17-a bye-election Serchhip biala awm turah hian Political Party zawng zawngten ṭan an la nasa ṭan hle tawh a,mipui nghahhlelh leh a boruak pawh hot hle tura ngaih a ni awm e. 

Mizoram People Forum (MPF) hruaitute chuan dik leh fel fai taka inthlanna a awm theihnan hma lak an tum thute Press Con­ferenceah an puang a. Political Partyte nena an thuthlung bawhchhia an awm chuan an puanzar tur thu thlengin an sawi a, a lawmawm hle mai. Kan hnung lawka AMC inthlanah khan dan bawhchhia an awm nia an hriat thu leh chutiang chu a awm leh a nih chuan an puanzar tawh tur thu thlengin an sawi a ni. 

He thu hi a lawmawm hle laiin engatinge AMC inthlana dan bawh­chhiatna awm chu an puanzar loh tih hi zawhna awm thei a niin kei pawhin ka rilrua ka zawhna a ni. AMC inthlana dan bawhchhiatna awm chu lo puangzar daih tawh ni se,  Serchhip bye-elec­tion lo awm turah hian Pol. Party tinte an fimkhur phah ngeiin a rinawm a, tutenge inremna thuthlung bawh­chhetute chu tih hi mipuiin kan hre dawn bawk a ni. 

MPFte hi duh aiin an inthlahrung mah mah tih hi ka lo hmuh ve dan a ni a, an hruaitute hi Sakhaw puithiamte an nih avang nge puanzar awm tak hi an ngawihpui mai chu le! Kohhran hoten dik tak leh huaisen taka hma la zel turin an ṭawngṭaipui reng a nia. Sual hi tereuhte a nih laia hmehmih a nih loh chuan a lo huangtau zel a, khap zawh rual lohin a lo punlun ṭhin si a. Election hun puan a ni tawh a,Model Code of Conduct hman a nih tawh avangin tun aṭangin MPF hian hma an lak char char a hun tawh hle mai. 

MLA bial khat chauha inthlang tur kan ni bawk a, entawn tlak inthlanna nei turin theihtawp chhuah ni se, nakin zela entawn tlakin MPF hian tun aṭanga inthlan ni thleng (last minute pawisa sem hun hnuhnung ti a sawi ṭhin!) hian ngawrh takin han duty thei se a sawtin a lawmawm hle ang. MPF te hian tihtakzetna nen hma an lak loh chuan beisei tur dang tutenge awm tawh ang le! 

Sual do hna hi a taka (practical)kan Sakhaw Puithiam hote nen hian thawh a ṭul tawh hle niin a lang ta, chu hna chu MPF aṭanga ṭan hi a kawng dik tak pawh niin a lang e. AMC inthlan kal ta-a pawisa chelek, zan rei tawh lama mitthi ral chhuanlama pawisa inpek thawm awmte leh adt. kha thudik a nih chuan ngawihpui mai lovin lo puangzar se a duhawm hle a ni.

Inthlan dawn apianga pawisa sem leh engemaw mipui hnena thil tiam ṭhin thu lo ri ziah ṭhin hi  tunge mawh phurtu ber ni ang le. Ram rorelna dik tawk lovin a nghawng, mi harsa zawkte hlamchhiah a an harsatna denchhena vote zawn nana mipui hnena pawisa sem nge, mipuite hian candidate-te hi sum siamnan hman kan tum hrim hrim tih hi a buk theih hle awm e. 

A eng zawk zawk pawh lo ni se thil ṭha lo leh dik lo ve ve a ni a, Kristiante tan chuan thil zahthlak tak ve ve a ni a, chutianga pawisa semtu leh dawngtu chuan Pathian pawi a sawi tihna a niin a sawhkhawk chu a la tuar ngei ang. Kan rama Politician, Vote leinana pawisa sem ṭhinte leh lo dawng duhtute an awm vang hian kan Sakhaw Puithiamte lo penchhuak in, Political Party hrang hrang ngenna avang khan thuthlung an siampui a nih kha. Hei vang ngawt pawh hian MPF hian tun hma aia inthlahrung lova hma an lak a ṭul hle tawh niin a lang e. 

MPF hian member pawh a ngahin inthlannan thla khat pawh hun  a awm tawh lo bawk a,chhun zan zawmin dutyin ṭan han la se, inthlanna entawn tlak leh hriat reng tlak an thlentir ngei a beiseiawm e. Tangka sum ngainat hi Sual tinreng bul a nih kha. 

H.Lalchhuanliana