INKHAWMNAA ZAI PHAL LOH HI

Ringtute tana tihmakmawh chu Pathian fak leh chawimawi hi a ni. Kan faka kan chawimawi theihna sang ber chu kan aw neihchhun chhuaha zai hi a ni. Tunlai hian Biak-Ina inkhawm chu phalsak kan ni ta a;zai erawh chu a la theih lohva;a khingbai khawp mai.

Zai hauh lova thu ngaithla ringawta ngawi renga thua kan han bang leh ringawt mai hi chu kim lo hlein ka hria a, Lal Isua fak nana aw chhuah miah lova kan awm chungchangah hianin Setana chu a lawm hle ang a, Lal lsua erawh chu a lungawi lo hlein ka ring a ni. Chawimawina hla kan sak ngam lohna chhan chu Covid 19 hri thehdarh tuah kan tang ang tih kan hlauh vang a ni.

Helai thua kan hriat atana tul ka tih chu-Kan Pathian hi thil engkim siamtu a ni a, Covid 19 pawh hi a siam a ni a, a duh hunah a lentir thei a, a duh hunah a tikiang thei a,a thilsiamte chu a thu thuin a awmtir thei a ni,tih hi a ni. Chuti ni sia a siamtu Lal Isua fakna tura kan zai ngam tlat lo mai hi, Isua hi rin tlakah kan ngai lo em maw ni le ? tih loh theih lohvah ka ngai a ni. A hming fakin zai ila, chawimawi ila, tilawm ila, hri tikiang tur emaw, a laka min venghim turin emaw dilin tawngtai ila.

Galili dila thliin a nuaia, a muhil an han kai tho va, thli chu,"Bang rawh,” ti-a a han hau chuan a bang ta duak ang khan Covid 19 pawh hi hau reh thei lo turah kan ngai em ni aw,ka ti. Thli pawh tunlai hri pawh hi a thilsiam tho an ni a, ti-thei tura kan rin ngam leh ngam lohva thu a ni ngei ang. Kan rin Pathian hi Baal puithiamte koh chhuah zawh loh an pathian ang kha a ni ve lova, mangan laia tanpui vartu hnai reng kha a ni tih hriain kawng tinrengah hmathehah I dah ngam ang u khai. 

L.Laikhuma