Kawng ṭha nghahhlelhawm

Kan sorkarin kawng ṭha min neih tir ngei tuma hma a lakna chak tak hi kei ni, thingtlang lam mite pawhin lawmawm kan ti a, kawng ṭha taka tlan per per hlan kan nghakhlel ta hle mai. Sorkarin a tum dan niawm takah hi chuan tun ṭhal lai ngei hian kawng chhe zualpui chu siam zawh vek an tum niin a lang a, a thlamuan thlak hle. 

Kan sorkar hian sum chu han hai chhuak tam hle mah se a hnathawktute lam hi a pawimawh si. Tun hma kan naupan deuh lai, BRTF-in Aizawl-Tuipang NH 54 an laih tirh lam leh an enkawl lai kha chuan a hnathawktute kha an ṭang thei hle a. Overseer kan tih mai, tun lai chuan JE kan ti ta emaw ni, te angte khan an bial chhungah khan hmun thum hmun li lai laiah khan hna­thawhna hmun an khuar a. Khang te kha overseer Grade II an ti emaw ni te khan an vil fir fer a, tichuan ni khat thil thuah pawh thui tak tak an siam mai ṭhin a ni. 

Tunah erawh kan JE-te hian an bial chhungah hian hnathawktu hlawm hran hran dah ve lo hian hlawm khat chauhte hian an thawk ni berin a lang. Chung pawh pickup pakhata phurh tawk lek lehnghal! Hetiang a nih chuan ni khata an thawh pawh a tlem tham ang reng viau dawnin a lang. Pioneer ho tih dan ang khan a tih ve theih loh emaw ni le?

Kan kawng chhiat dan lah hi sawiin a siak si lova, ṭhal hun, a thawh hun lah hi a rei vak dawn tawhin a lang lova, ṭhal lai hian kawng ṭha kan nei thui hman lovang tih a hlauhawm. Kawng siamna tur pawisa pawh a tam thawkhat turah a ngaih theih a. A thawktu lak tam ni se, sector hran hrana bun tur hian sum a ei hek chuang lovin, kawng siam erawh a chak phah ang. Hetia sector khat lek leka JE pakhatin a bial a vil chauh zel dawn a nih chuan kawng siamna tura sorkar pawisa awmsa hi kan dah tawl (lapse) ṭeuh mai ang tih pawh a hlauhawm. 

Thingtlang mi­puite hian kan chiseh lakna ber kan Aizawl kan panna kawng chhe em em reng mai hi a ṭhat hlan kan nghakhlel em em a, siam thuai thuai teh u. Mipui tana chak taka hma lak tumtu sorkar hi, kawng siam lamah hian a hmai kan ti bal palh ang tih pawh a hlauhawm! 

Kawng chu an han siam ṭha leh ngei ang a, kei ni, a hmangtute pawh hian duat taka enkawl i tum teh ang u. Tam tak chuan kan in sakna tur rod tlawn han chhut mar nante kan hmang leh mai ang a, tin, tui pipe emaw han phum nante laih chhiat kan chak leh tlat ang a. A ṭhenin insuk nante emaw kan it leh riau ang tih a hlauhawm hle. Hetiang thilah hian hmang tawh lo hram ang u. 

Kawng chhia leh National Highway meuh a kawng siama hnatlan ṭhin kha a hrehawm mai bakah, kan minister-te khan zah nachang hre lo viau mahse kan ṭhen­awm state-te pawh an zawhawm duh em kha maw! 

Patrick Z, Chhingchhip