MZU Forum ka thlir dan

C. Lalrosanga - MNF candidate thu­sawi kha ngun taka ngaihtuahin a inbuatsaih ṭha tawk lo niin a lang, public meeting thusawi ang deuhin a sawi. Ama thiamna hrim hrim, a inrintawkna leh a hriatna kha a ṭha em em thung, a aw a ṭha bawka sawi hrim hrim chu a sawi thiam a, mahse point a mumal tawk lo. A thusawi pakhat Lengpuia thlawhtheihna an ṭum loh chhan kha a sawi sual a nih loh chuan Chief Minister Pu Zoramthanga thusawi sual thup tumin a rawn tui hnih tihna a ni a, tun hnaia Jet Airways, sum lama tlakchhiat vanga inhnukdawk an ni, Lengpui airport-ah chuan Indian Airlines an la ṭum reng a, a chhe lo a nih hmel. 

Hnam dang pakhatin English-in zawhna a zawt zauh kha Pu Rosanga tan English thiam lantirna remchang tak a ni a, a thiam nal hle a, chutih rualin kha a zawhna chhanna erawh a felfai lo thung. Sorkar lama a tawn hriat neih a sawi uar a, hei hi tling ta se a ṭangkaina tur pawh a ni thei a, nimahsela Pensioner a nihna hian a pawt hniam thei. Zirlai pawl duh loh chu pensioner rawih nawn a ni si a, a sorkar hun tawp hnuah politics a buaipui thar leh a, hei hi a vote paihtu tur a ni. 

Chutihlaiin ruling party a ni hi a tan chuan innghahna tham a ni. Ruling hian thingtlang lamah nghawng a nei lian ṭhin si a, Aizawl leh ṭhalaite lamah tla na vak lo mah se thingtlang lamah ruling a nihna buk a rit dawn a, tlinna chance a nei. Lalnghinglova Hmar - Independent candidate a nih thu leh Congress leh ZPM thlawp a nih thu a sawi. A thil tih tum point 10 a rawn sawi chhuak angin a sawi a, mahse a takah chuan point 12 angin ka chhinchhiah. A thil tumah a chian viau rualin point ṭhenkhat kha chu a generalised mah mah. Orator a ni a, mipui hneh theihna a nei. Mi hmingṭha leh mi chak a ni tih ram pumin kan hre tawh a, a insawi anga a tih theih chuan MP ṭha tak a ni ang. A thusawi danah ram a vei tak tak tih a hmuh theih a, 'CAB hlir a sawi' an tih ṭhin khan zawhna an chhanna tih lohah chuan CAB tel miah loin MP nih a duh chhan leh a tih tur lam a sawi par par. 

A duhthawh leh ṭan luatah a sawi rang mah mah a, hriat fiah harsa lai a awm. Kum 42 mi, vanglai hun hmang mek a nih hi a elpui ber pensioner aia miin an duh chhan ber pakhat a ni ang, ṭhalai vote 70%-80% a hui phak hmel a; nu leh pa, Chakma leh Bru lam vote a hmuh loh chuan a tling lo thei bawk. Ama mimal weight bakah a thlawptu party pahnih hi an ṭan rual chuan tlinna chance ṭha tak a nei.

Hriata Chhangte - Social media lama thawm na tak nei, ṭhalaite läwm hlawh, a ṭhenin mahni infak ṭhin tia an sawi Pu Hriata Chhangte khan MZU discussion-ah na na na kha chuan lawm a hlawh ber. Vote a hmuh hnem ber dawn leh dawn loh chu ka hre lo. Amah khan ṭhalai lawm zawng turin a han sawi vel nen nuihna a tam a ni. Thu a thiam a, a hriatna a zau a, hlimawm takin a sawi chhuak thiam a, MZU zirlai kan nui hum hum a, a program a serious em avanga hun boring tak ni thei kha Pu Hriata vangin hun hlimawm tak a ni. Ama sum seng a in candidate hlawm nawlh a nih hian "MNF decoy" tia an puhna hi a hnial thla vekin ka ngai a, MNF in neutral vote pawt peng tura an dintir anga an puhna hi chu a dik a rinawm ta lo. Vanduaithlak takin tun ṭum chu tlinna chance nei loah kan dah thei. 

TBC Lalvenchhunga - Prism candidate TBC Lalvenchhunga kha a naupang ber mah ni se a bright ber hialin a ngaih theih. Thu a sawi thiamin a inringtawk em em a, nakina ram hruaitu ṭha tak a la nih ngei a beiseiawm. Chutih rualin a thusawi kha a in show ve deuh a, thil ṭul lem lo data leh statistics a sawi nasa a, "Ka hre ve tawk a ni," tih lantir a tum mah mah. 

A ram vei dan a genuine a, Hindi a thiam hle a, a chhiar zau tih a lang bawk. Chutih laiin a party PRISM ho ze put an tih mai 'midang aia hre bik' intihna zia a pu lek lek a, he zia hi a paih loh chuan vote hmuh tam a harsa. MP candidate bright tak, naupan anga ngaihnep theih loh, future ṭha tak nei a ni a, ama tan chuan he platform hi Mizo mipuite hmaa a introduction ang deuh a ni a, kum 10 hnuah ram hruaitu a nih nawlh pawhin thil mak a ni lo ang, a inpekna leh hriatna a thuk tlat. 
TBC-a a lo lang hian Tetea Hmar ṭhalai a nih vanga pensioner nena khaikhinna boruak kal mek pawlh dal hlektu a inlar angin a sawi theih a, PRISM in tlin inring lo chunga ṭhalai bright tak candidate an siam hi MNF chu an lawm khawp ang - a chhan chu 'pensioner versus ṭhalai' tihah ṭhalai dang hming a rawn lang. Tun ṭumah chuan tlinna chance a la nei lo. 

He programme pumpui thlirin a tawpah mi pahnih kan buk dawn a nih hmel. Kan vote dan hi kha discussion aṭanga thutlukna siam tur a ni si lova, vote suk thlek hi intellectual level aṭanga thlir ngawt theih a ni lo; voter zingah intellectual lo an tam zawk zel. Vote hmu hnem ber an tling ang. 

HS Tea