Geologist te i hmang ṭangkai ang u

Mizoram hi ram leilung naupang tak leh nghet lo tak a ni a, Plate Boundary te in nawk/ sut chet bur burna chung zawng, lirnghing tehnaah pawh nghin duh berna Zone-V Category-ah awm kan ni bawk. 

Seismological Institute Gujarat, kan office bul maia awm leh vai ṭhiante Seismologist ho phei chuan kan ram leilung hnuai hi englai pawha che reng ‘minor quake’ thleng reng leh awm reng angin min hrilh ṭhin. Heng tectonic plate pahnih Indian leh Eurasian plate te insut tawm chho avanga Mizoram pawh hi rawn insiam a ni a, chu mi avang bawk chuan kan tlang leh mualte pawh chhim leh hmar hawi zawnga in khawh a ni deuh vek. Tectonic plate te in nawkna avang chuan kan leilung chhung rilah hian lirnghing na tak thlen thei reng force in phun ru awm renga rin a ni bawk. 

Tun hnaiah oil leh gas company te an rawn lang a, kan quarry leh in te a min/ chim tak fo avangin Geologist pawimawhna kan hre chho ṭan a, a lawm­awm khawp mai. Aizawl khawpui chhungah bik phei chuan in sa tur chuan AMC aṭangin phalna an lak a ngai ta bawk a. Gujarat lamah chuan 2001 ah lir­nghing na takin a sawi avang khan lir­nghing leh mai theihna hmunah te chuan sawrkar pawhin building chhawng khat bak sak a phalsak lo a ni. Mizoramah pawh rule and regulation mumal tak kan hman a hun. AMC lamah pawhin in sak phalna kan pek hma in a hmunhma uluk taka en fiah a, building a dawl zawh tawk tur chauh sak phalna pek ni se. Planning mumal taka In kan sak tir loh chuan kan Aizawl khawpui hi a rit lutuk tawh a, eng emaw thleng se kan pherh nasat lutuk dawn.

 
Sawrkar building leh building lian, leihlawn lian tham kan sak/dawh dawn reng rengin Core Drilling, lei verh chhin a, foundation, building structure innghahna tur ngheh tawk leh tawk loh en fiah ni se; mahni duh dan leh sum neih azira kan engineer te kan draft tir ngawt zel hi sim a hun. Building structure kan ngaih pawimawh ang chiah hian building innghahna tur site foundation kan hriat chian hmasak a ṭul. In hmun kan laih dawn emaw, in kan sak hma in kan hmun hma a him leh him loh geologist te kan en chian tir phawt 
ṭhin tur a ni. 

Kan engineer te pawhin geologist te zai ngaiin building structure duang ṭhin se. Sawrkar pawh­in geologist ngai pawimawhin thu neihna chin siam sak a ṭul. Geologist ten sak phalna clearance an pek hnu-ah chauh building sak ni se, a him ang. Mizoram ngeiah pawh geologist thiam tak tak kan nei ta nual a, rawn nachhang i hria ang u. 

Zela Ralte, Petroleum Geologist