Kuthnathawktute hmuhsitna budget

Kan hotute budget chin vet dan han hmuh chuan, inthlan dawna an thusawi kha 'DAWT MUHLUM' a ni tih a raw lang chiang ta. Mizoram sorkar hian kuthnathawktute hi engahmah min ngai lova, kan chanpual turin pawisa an dah miah lo a nih chu mawle. Tuna Budget thar berah hian 3.38% chiah kuthnathawktute kaihhnawih department-ah an dah an ti.

March 11-a chanchinbu kha kan chhiar chuan Mizorama kuthnathawktute tana thu lung chhiat thlak tak hmuh tur a awm a, chu chu kan pawisa chahn tlem zia a ni.  Kan ram neitupa chuan cheng 100 sem tur a nei a, mi chi hrang hrang a hnuaiah kan awm a, damdawi ina hnathawk chi, police lama thawk chi, zirna sikula thawk chi, sorkar inrelbawlna hmuna thawk chite an awm angin kuthnathawktute tana pawisa an dah chu na cheng 100 zinga cheng 3 vel lek zuk han ni a, hei vang hian MNF sorkar hian kuthnathawktute hi a ngai pawimawh lo hle tih chu a lang chiang hle a ni.

He budget hi a hriate chuan kuthnathawktute tana dah hran a awm lo an la ti zui a, 3.38 hi Agriculture Department chauh ni lovin Agri­culture, Horticulture, Animal Husbandry and Veterinary, Sericulture leh Fisheries department lama sum awm zawng zawng belhkhawm a ni a, hei hi Mizoram kuthnathawktute hian i hria ang u. Chumi awmzia chu maw, heng Department hrang hranga hnathawktute hlawh tur a ni ta ber mai a, kuthnathawktu pual pawisa a la ni lo zui an tih chu mawle! hawh u, kan budget kha kuthnathawktute hian kan thiam dan dan in i boycott ve teh ang u.

Keini chu Aizwla kawngzawh leh nawrh huaihawt ve hman kan ni lova, kan nawrh thiam dan chu inthlan dawna vote thlakah a ni emaw, kan kalna apianga au chhuah pui a nih pawhin a pawi lova kan thiam dan danin i boycott ang u. Heti lutuk hi chuan kan sorkar hian min naihthah tawh lo se, sorkar hnathawk mi tlem te hlawh tura kan budget neih ang ang serh hran hi chu rilru a na a ni.

Vanlalmawia