Tunge kan ṭhatpui ber ang?
Lok Sabha Election a lo hnaia, platform hrang hrangah an ding ta nual mai, an hnathawh dan turte an sawi a, ṭha tih zawng pawh kan nei fur hlawm tawhin a rinawm. Tehfung pawimawh ber pakhat atan an thlen tawh chin, an line ṭheuhah eng level nge Mizoram an thlenpui tawh tih hi hman a ṭha khawp mai.
1. C. Rosanga hian AIR/ Doordarshan kha eng level-ah nge a thlenpui? Mizoram tana hmingṭhat puina tham a thlen em?
2. Tetea Hmar hian eng level-ah nge MFA a hruai thlen a, Zoram Football hmasawn nan enge min thlen pui? Amah avangin eizawn nana football hmang tawh engzat nge awm?
3. Hriata Chhangte hian Mining Engineer a nihna hmang hian eng chen nge a thlen? Mizoram tan eng chen nge a thawh tawh a, hmingṭhatna a thlen tawh?
4. TBC-a hian eng chen nge Zoram tan a thawh tawh a, eng chen nge a hnathawh hmanga Mizoram a chawisan tawh? Navy a ṭan lai khan Mizo tan hmingṭhatna eng nge a thlen?
Heng zawng zawng hi a tehfung pakhatah hman nachang hriat tel a ṭha khawp mai. Interview-a che ṭha, thusawi thiam, au ring, ruling an ni sia thil an ti thei ang tihte hi kan thlirna tlangpui niin a lang a, heih a
ṭha tawk lo ang.
An line ṭheuhah Mizoram tan hlawk takin an thawk tawh em tih hi kan tehfung pawimawh tak tur pakhat chu a ni. Zoram hmangaih thu leh, kal dan tur ṭha tak tak sawite hi hruaitu ṭha an ni tihna a ni kher lo thei. Ram tana theihna nasa tak lo hlan tawhtute bawk hi Mizoram mipui hruaitu atan chuan an ṭha ang tih hi thil rinhlelhawm lo tak a ni.
Mipui chuan mi ṭha kan duh tih chu a hriat a, mahse mi ṭha tehna dik a awm thei si lo hi a buaithlak lai chu a ni. Mi tu emaw a thusawi ṭhat vang emaw, interview-a a rawn chet ṭhat vang emaw khan mi ṭha tak a ni e, tih ngawt theih a ni lo. Tehfung awmze nei zawk hmanga kan MP tur hi kan thlan a ngai.
Kan candidate-te hi mi ṭha tak vek chu an ni ngei ang, mahse Zoram hruaitu atan hian mi ṭha satliah aiin hlawk taka thawk tur, hmasawnna thlen thei ngei tur hi kan mamawh zawk chu a ni. India ram rorelna sang bera ding tur kan thlang dawn a, Zoram tana ṭha ber tur ram tana ke lo pen tawh ṭhinte bawk hian min hruai se kan ṭhatpui ber mai lawng maw?
Tluangpuii