Serchhip bial Bye Election thunawi

A inṭan dan : A chhan leh vang sawi thui ngai lovin kan hre vek awm e! Serchhip bialtu MLA, Pu Lalduhoma chu Anti Defection Law bawhchhia-a puh a nih vangin MLA aṭanga bantir a ni a, amah leh an Party hotute thutlukna siam angin Law Court lama kal lovin Bye Election neih mai ṭha an tih avangin Serchhip bial-ah hian By Election nei tura inpuahchah mek a ni a, ECI lamin ruahmanna a siam dan chuan April ni 17-ah vote thlak tur a ni awm e. (Mizorama Political Party leh kohhran ṭhenkhatin inthlan hun sawn turin ECI an ngen thung)

Enge an sawi : Rorel lai MNF Party President, Chief Minister nibawk Pu Zoramthanga chuan, Serchhip bial By Election neih tur chu khawvar hnu pawh ni lo, sang taka ni a chhuah hnua inthlang tur an nih avangin rorel lai Party chuan chak turin chance ṭha tak an nei tih a sawi a. Aizawl West I biala Bye Election neih tawhah pawh rorel lai an tlin avangin Serchhip bial mipuiten MNF candidate an thlang tling lo a nih chuan mi'n an nuihzat a hlauh thu a sawi a. Hetihlai hian MLA a nihna aṭanga paih tak ZPM candidate, Pu Lalduhoma chuan khaw en hnu, rorel lai pawlte mizia zawng zawng hriat vek tawh hnua inthlang tur an nih avangin mipuiten rilru an siam theih a beisei thu a sawi ve thung a, amah chu dik lo tak leh dan kaihlek hmanga ban a ni tih a sawi a ni. MPCC Treasurer, Pu Zodintluanga chuan, Serchhip bial By Election neih tur chu ṭum danga thil thleng ngai lo a ni dawn tih sawiin, ṭum danga Bye Election-ah chuan rorellai Party hneh lo tura ngaiin, an insawm khawm a, an beih rawn chiam ṭhin a, tunah erawh tlin inbeisei theuhin party tinin inthlan an hmachhawn a, hei hian By election danglam tak a nih zia a tarlang a ni, a ti ve thung a. Heng hruaitute thusawi aṭang hian Serchhip bial Bye Election neih tur chu inthlan danglam tak a ni dawn tih a tichiang hle a. Serchhip bial mai ni lo, Mizoram mipuite pawhin he inthlan neih tur hi an ngaihven tih a hriat theih a ni.

Hriatthiam har : Tun ṭuma bye election neih tur hi inthlan dang nen a inang lova, bye election neih a ngaih chhan pawh ṭum danga by election neih chhan nen a danglam deuh avangin eng angin nge boruak a inlumleh dawn hriatthiam a harsa hle a. Miṭhenkhat titi aṭang chuan ZPM Candidate, Pu Lalduhoma chu MLA aṭanga ban a nih danah mipui khawngaih a hlawh deuh ni-a sawi a ni a, neutral mai ni lo, Party-a inhmang miṭhenkhat pawhin vote an tum hlawm ni-a sawi a ni. Hetihlai hian MNF Candidate, MNF Vice President nibawk Pu Vanlalzawma chu a tling a nih chuan Sorkar-a dinhmun pawimawh tak chelh thei tur a nih avangin a boruak a te lo niin an sawi thung a. Hei hi MNF Party pawhin Campaign nan an hmang nasa hle niin a lang a ni.

Bial chhung mi ngei : Serchhip bial hian an bial chhung mi ngei MLA an la nei ngai lo ni-a sawi a ni a. Tun ṭuma Bye election neih turah hian Congress Party chuan he thu hmang hian beihpui thlakin, Candidate-ah pawh Serchhip khaw mi an dah a, an Campaign auhla-ah pawh bialchhung mi ngei tih ring taka vawrhin, an Party mi muthlute kaihthawh tumin nasa takin ṭan an la a. BJP pawhin Serchhip bial-a Vote nei lai ngei Candidate-ah vawrh chhuakin, Central-a rorel lai an nihna changchawiin, an tling a nih chuan Central aṭanga hmasawnna tam zawk hnuh luh theih an inrin thu an sawi a. PC Party pawhin Brig. T. Sailo Policy hmanga mipui kaihthawh tumin ṭan an la ve mek bawk a ni.

Tlangkawmna : Engpawh ni se, ECI ruahman anga inthlanna tluang taka kalpui a nih chuan Vote thlak nan kar tam hun a awm tawh lo a. MNF Candiadte, Pu Vanlalzawma a tling a nih pawhin, thil mak a ni hran dawn lova, Pu Lalduhoma bawk thlan nawn a nih pawhin a awm ve reng a tih theih ang a. Serchhip bialah hian Congress chu Party ruhrel lian ber pawl a nih avangin Pu PC Laltlansanga a tling a nih pawhin a awm ve reng a tih theih dawn a. ZPM len leh len loh emaw, MNF party len leh len loh emaw, Congress party len leh loh lam aiin, tun bye election hi chu Pu Duhoma disqualify a nih dan mipuiin an pawm leh pawm lohin a hril berin a rinawm a. Mipui ngaihdan kan hre thuai turah ngai ang.

Samuel Lalruatsanga