UNAUTE U ZAM SUH U

Káwl ram buaina avanga kan unaute dinhmun khirh tak lo inmung mek hi pawi kan tiin kan tuarpui takzet a. He buaina hi, engti zawng pawhin hmachhawn se, àwm kan tiin kan hriat thiampui a. Rilru fím tak pú-a, zäm hauh lova an hmachhawn theih nan leh, an tana thil ṭha ber an sùal chhuah ngei theih nan, Engkim tithei Pathian hnenah ṭawng­ṭaiin kan dil a ni.

Mizote hian Mizo­ram (sq km 21,081) pawnah chuan, Chin state (sq km 36,019) leh Kaley Kabaw phaizawla kan unaute bawh ram anga zau leh nghet hi khawvelah mahni tapchhak záwl anga tlangnelna ‘Zoram Khawvel’ dang kan nei lo va, kan neih belh tawh ngai kher lo vang. Chhinlung chhuak zingah, so­vereign state-a vice president ni thei, Henry Vanṭhiaua bâk an piang leh tawh kher lo vang, Dr Sasa tih loh, sovereign state mipui aiawha United Nations-a special envoy ni thei pawh an piang leh tawh kher lo vang.

Myanmar mipui zinga Chin, 0.88% lek aṭangin, he kum 20 lek chhung hian, chutiang mi pawimawh pa­hnih chu an chhuah theih laiin, Mizo­rama chengten India politics-a pawimawhna kan neih nêp sâwtzia te hi chhût ila. Kan thlahte hmákhua thlír chunga, rilru zau leh inhawng taka kawmchhak unau raltlante lo chhawmdawl hian, lukhawng hlu tak a neih kei chuan ka ring. ‘India rilru’ hre chunga ‘Mizo rilru’ hman hun a ni.

Ralkhat aṭangin tihsak theih nei tam lo mah ila, mikhualte hnar lova, an chunga ṭhat chhuah ṭhin kan unaute lo mi­khual lêt hi chu kan tihmâkmawh a ni. Zonunmawi hi rawn tem rawh u. Kan kawmcharten an lo hnar cheu a nih pawhin, keini chuan, nunau chu 'rál tlan' ena en lovin, khual ṭha thlenin kan lo thleng zel ang.

‘Kâwktu’ erawh chu kan lo ‘kâwk’ ve ang.

Vanneihtluanga