KHEP KHEP MAI DAWN A
Tun ṭuma kan ram hruaitu thlan chhuahte hi kan thlan fuh ber pawl ni turah ka ngai a, a chhan pawh sawrkharna chelh pha ta lo zawk opposition lam thlenga an ṭhat hlawm ṭhih ṭheh em vang a ni.
Opposition lam chauh pawh hi han en ila, inthlan dawna kan hmuh danin anni aia ram hmangaihtu awm lo, kohhran leh mipui duh rawn, an aia fel leh tling awm chuang lote kha an ni ve bawk - ṭha khep khep tak an ni.
Assembly Session neih hmasak ber ṭuma an ṭawngka hman aṭang reng reng khan mi namai an ni lo tih a hriat reng mai a, ruling tan pawh fimkhur thiam a pawimawh viau awm e.
Social media a chak tawh a, ram hruaitute pawh an fimkhur thiam a ngai ta. Chhe te a hming ṭhat hlawh theihna a nih rualin chhe tea hming chhiatna thlen thei thil a tam tawh a ni. Kan Minister thar pakhat chu traffic jam vanga office tlai ai chuan tiin a minister motor aṭanga chhukin two wheeler taxi-ah a chuang a ni awm a, he thu hi ram pumin kan hre nghal mai a, chuvangin kan che vel hi a darh chak tawh a, kan fimkhur thiam a ngai hle.
Tin, ni 4 leka upa cabinet meeting-in sawrkhar kaihhnawih enkawl wineshop zawng zawng khar a nih nghal thu leh mimal wineshop-te pawh December 21 - January 14 thleng dry day hmangin an khar nghal a. Hetiang taka Synod leh Kohhran hrang hrangte vei ‘zu zawrh’ khap tura hma an han la nghal maite hi fak nachang hriat ve awm tak a ni; thil sawisel kan peih ngaihtuahin.
In thlan hma khan zu zawrh sawi mawi zawngin party mai ni lo, mipui te pawhin ṭawng kan cheh ngam lo. Tunah sawrkhar tharin zu zawrh khap zawngin hma an la a, social media lamah ṭawnghmang thiam tak taka zu zawrh sawi mawina thu a tam ṭan leh ta.
Chuvangin, zu zawrh chungchanga kohhran duh dan anga kal sawrkhar thlavang hi kohhran pawh hian hauhsak ve se, fak ve rawh se. A nih lohva kohhran a ngawih leh kur si chuan zu zawrh hi kan lo pawisa tak tak lo va, tute emaw vuak nan kan ti mai mai tihna emaw a ni thei ngei ang.
Eng party pawh sorkar se, sawisel a ṭul hunah sawisel ila, fak phu khawpa an chet hunah erawh fak hreh lo bawk ang u. Tichuan, sorkar ṭha kan nei thei ang.
R.Lalfakawma, Seling