Party ni loin Mizoram tan vote thlak ang

Tunkar tir lam khan Chief electoral officer (CEO) Ashish Kundra chuan April 11-a Lok Sabha MP inthlan lo awm tur atan inthlanna thianghlim leh felfai buatsaih tura an inpeih tawh thu a sawi a, hetiang tak hian Mizoram LS MP inthlan muanawm kan nei ang tih pawh a rinawm.

Mizoram hi India ram state ralmuang ber tia chhal leh hriat kan ni ṭhin a, hei hi Mizo mipuite tan hriat a nuamin kan inchhuan ve theihna kawng pakhat a ni. Hetiang taka state ralmuang ni thei tur hian kan hruaitute leh mi pawimawh tam takin nihna chan huamin thil an lo ti tawh ṭhin a, hei hi vawiin thlengin mipuite pawhin kan zahin kan vawng him ve tur a ni.

Mizoram MP inthlan turah hian party ṭan bik leh tih bik ka nei ve lem lo. MLA election ah pawh ni se neutral takin ka mi duh zawng, mi ṭha nia ka hriat ka vote mai ṭhin. Ka chhungte erawh mi ṭha vote turin ka sawm a, mahse an duh ang mi an vote ka phal sak thung ṭhin. Hmun dangah mi dang hnenah phei chuan ka campaign ve ngai meuh lo.

Tun ṭumah hian hian MP candidate mi ṭha tak tak kan nei hlawm a, mahse kan ngaihtuah tura ka duh chu Mizoram leh Mizote tana him tur MP thlang chhuak ang u tih hi a ni mai e. Chumi chu vote tur tiin sawi theih ka nei lo a, politics ah ka inrawlh ngai bawk lo.

A pawimawh ber chu Mizoram MP tur hi Mizote tana mi ṭha, Mizo hnam tana mi dik an ni tur a ni tih zawng hi a ni e. Puitling i nih chuan vote thlak ang che.

Ramhmangaiha