DAWT SAWI

Thufing pakhat chuan, 'dawt pakhatin dawt dang a hring,' a ti a, a dik khawp mai. Dawt thu khuhmawi turin dawt dang vek sawi a ngai tawh tlat

ṭhin. Chuvangin, miin dawt pakhat a sawi tawh chuan dawt thu tam tak sawi a hmabak tihna a ni.

Sapho in dawt var (white lie) an tih mai, dawtthu tenau/ dawt thu pawisawi lo ang chi te pawh hian dawt dang a hring chhunzawm zel tho. Chhungte bulah leh mi ina thil min lo zawh thutte hian dawt var ang chi hi han sawi ve zeuh ka ching a, mahse, chungah pawh chuan chu ka dawt thu sawi chuan dawt thu dang vek min sawi chhunzawm tir ṭhin, ṭha lo tak a ni.

Dawt thu sawi hrim hrim hi chu dawt var pawh ni se a lo ṭha chuang lo, chuvang chuan dawt var ang chi pawh hi sawi tawh loh bur ka tum!

Politician nih vanga dawt sawi thiang ang kan ngai ngawt te a nih phei chuan kan tisual der a ni. Dawt thu sawi hi sawi awlsam viau mah se, mite rin hlawh lohna leh min ti zahawm lotu pakhat nih tlatnate chu thu dang nise, mi huatthu sawinate, mi rilru tihnatnate leh lungin hial tan theihna a nih avangin sawi loh a him ber a, eng thilah mah dawt thu sawi ngai lo tura kan rilru kan siam nghet a pawimawh hle.

Pathian nung ringtu inte, krista hnungzuitu intite tan phei chuan sawi chi loh hulhual a, Bible min zirtir dan pawh dawt thu sawi lo tur tih kan ni.

Politic thilah hian dawt thu sawi hi a lo awl bikin, sawi a lo nuam zawk a ni mai thei, party leh party inbeihnaah te dawt hi a tu ve ve party pawh hian an sawi leh fo mai. Mahni khingpuite VC aṭang MP inthlan thlengin dawta han beih maite hi kan hruaitute hian an hreh lo ni hian a lang. Mahni khingpuite dawta han bei duh mai politician tam tak hriat tur an awm fo bawk. He thil hi bansan a duhawm ngawt mai.

Dawt hi chu eng thilah mah a tlo lova, thup hlen theih lah chu a ni bawk si lo a, chuvang chuan mi dik pangngai ni thei turin dawt thu sawi mi ni lo tura kan rilru kan insiam a pawimawh khawp mai. Kan pi leh puten, 'Thudik leh saihlum a nget thei lo,' an lo ti. Thudik chauh sawi ṭhin mi, thudik ngaina mi, thudik ṭan mi nih tum ṭheuh ila kan nunhona boruak hi a va nuam dawn em.

Dawt thu hian mihring nun a ei chhe nasa thei em em a, mihring nun a ti zahawm lo thei hle bawk; rah ṭha a chhuah ngai lo bawk. Chuvang chuan dawt thu sawi mi ni lo tura kan inbuatsaih a pawimawh khawp mai. Thudik tak hi ngaihthlak hreawm deuh ṭhin mah se, kan tan a ṭha ber zawk a, chuvang chuan dawt thu ai thudik hi i ṭan tlat ang u.

Dawt thu sawi ching mi kan nih chuan tun aṭang hian bansan ila, kan va han ngaihsan awm dawn em.

Nawlchunga Chinjah Meisatla, Siaha