Ziaka dah leh Voice Record

Kan naupan lai chuan kan rual uten, 'Tlan leh vawm, din leh hnek,' tiin min vau bet ṭhina duh thlan tur zawk hriat a harsa ṭhin a, chutiang deuh chuan tun hnaiah kan Minister of State pahnih chuan Mizoram Rorelna In Sang Assembly House-ah pakhatin ziaka dah a phût a, pakhat zawkin voice record a phût ve leh bawk a. Hetiang reng reng hian kan ram hruaitute hi an che a nih chuan mipui nuih za dur dur hi inthlan leh dawnah vote thlakna an sawn sup sup lovang tih tunge sawi thei le? Kan Minister te bakah MNF Party hi tlema a fimkhur chhoh deuh deuh a ngai a ni.

Minister zahawm tak pakhat chuan MNF-in inthlan dawna cheng nuai 3 sem an tiam chung chang an sawi chu, 'Ziakin a awm em ni?' tiin a han zawt let mauh mai a. Ziak aia chiangin mi pangngai chin phone-ah chuan MNF President in campaign laia, 'Cheng nuai 3 in dawng dawn...,' a tih leh duhthawh taka, 'NLUP dawng tawh pawhin in dawng dawn,' a tih belh kherna kha an la kawl vek a ni.

Kha kha ziaka dah ngai lo thil chiang a nih bakah 2018 inthlan dawna social media post kha hai chhuak ila, 'Nuai 3, Nuai 3, Nuai 3,' tih a ri nuai nuai a nih kha mawle.

Congress MLA pakhat khan 'Chief Minister Pathian ṭih avangin Covid-19 lakah kan him kha an ti a....' ti zawng khan a han khak ri tel zau mai chu Minister pakhatin a pu a rawn chhan ta a, a voice record (Minister pakhat khan voice record ni lovin ziaka dah a phût kan tih tawh kha) a rawn phût ve leh ta mauh mai a. Mahse Congress MLA kha a lo duai bik si lova, CM Pathian ṭih vanga Covid-19 laka him thu an sawina MNF Press release ngei chu Assembly House-ah a lek chhuak ta va va mai a.

Congress pa hi thu pawh sawi zo thei lovin Minister pakhat chuan a rawn au buai leh ta a, a bak chu kan hriat angin House pawnah khan an lo invau zui tihte thuthang a awm leh ta zel a, a hmuna awm lo tan hriat ve theih a ni tawh lo.

Ziaka dah an ti thul, voice record an ti thul, hei hi mipui hian an lo hriat kar tawh avangin vote an minus char char thei tih hria in inngaitlawm leh thuhnuai rawlh tak in che tawh se, voice record tih zawng chuan voice record dang mualpho phahna tur kha a awm thei tih a darh hluai tawh kha.