‘CONSTITUTION HNUAIAH’ RIGHT TO SECESSION BILL?

Tunhnai-ah MP inthlan boruakin min chiah chho a, candidate pakhat TBC Lalvenchhunga chuan Citizenship Amendment Bill dona atan 'Constitution hnuaiah' ‘Right to Secession Bill’ putluh a tum thu a sawi a. CAB doletna awmze nei awmchhun niin an inchhal nghe nghe. Hei hian sawi zui a hlawh hle a, hemi avanga amah thlawptu engemawzat an awm rualin hetiang hi a tak ram a theih a ni lo tia thu inchuh a awm bawk. Hemi chungchang hi ngaihtuah ho a ṭul hle mai.

India danpui (Constitution) duanna a a meizanghlaptu ber Dr B.R Ambedkar chuan heti hian a lo sawi a: ‘India ram hi federation kalphung tur ni mah se ram bung hrang hrang (states) te inremna a lo piang a ni lova... India ram bung satthla a inlakhran theihna chanvo (right to secession) hi tumahin an nei lo a ni. He ram hi a thendarh leh satthla zawng a kalpui theih a ni lo... inrelbawlna atana a ṭulna avangin ram bung hrang (states) ah ṭhendarh theih ni mahse la…’ (Constituent Assembly Debates Vol 7 pg 43)

A chunga tarlan aṭang hian India danpui duangtuten India ram bung sahthlaka inlakhran (secession) chungchanga an rilru put hmang chu a hriat theih ruak mai. India Danpui kan han nei a, Danpui chuan Parliament chu India ram chhunga state thar siam leh ramri siksawi te, state hranga ṭhendarh leh finkhawm chungchangah te thuneihna pe mah se ram satthlaa ram dang pek emaw India ram satthla zawng chuan Parliament hi thuneihna a pe ta lo a ni. (Article 3, Constitution of India)

India ram bung hi ramdang hnenah pek (cede) theih a ni em tih chungchangah zawhna a lo piang ta a. He zawhna hi ‘secession’ (India ram bung aṭanga inlakhran/ indan) nen inang chiah lo mah se a inzul thui avangin thlir ho tel ila. 1958 khan India leh Pakistan chuan ramri chinfelna atan ram bung ṭhenkhat in pawi fei thleng turin inremna an siam a, Nehru-Noon agreement an tih mai chuan ram bung ṭhenkhat inthleng an tum a. Hemi chungchangah hian India President chuan Article 143 tlawhchhanin Supreme Court chu a rawn ta a. 'He agreement tipuitling tur hian Parliament-in dan a siam a ngai em? Parliament-in Article 3 hnuaiah hian thuneihna a nei em?' tih te a ni.

Supreme Court chuan India ram sahthlak hi Constitution pawna awm niin India hian ram dang hnuaia kun lo thuneihna pumhlum nei (sovereign) a nihna hmangin constitution pawnah ‘politics’ hmangin a fawng vuantute chinfel chi a ni tiin a sawi. (Srinivas Burra, Faculty of Legal Studies, South Asian University, New Delhi)

South India lama political party ṭhenkhat, a bik takin DMK te ho chuan inthlan boruak velah ‘secession’ hi vote zawnna atan an lo sawi ri ve fo ṭhin a. Parliament-ah te pawh sawi rik chu a lo ni ve tawh ṭhin. (Bill anga putluh ni lovin).

Hun a kal zel a, India ram bung satthla tura hmalakna venna atan 1961 ah chuan National Integration Committee din a ni a. He Committee hian November 5, 1962 ah an report an thehlut ta a ni.

1963 ah chuan India danpui siamṭhatna ‘16th Constitution Amendment Act’ hmang chuan India Danpui a ‘Fundamental Rights’ hnuaia mi Article 19(2), ‘right to freedom of speech and expression’ an tih mai hnuaia duh duh sawi theihna chanvo in a huam ve loh ho (exceptional clause) chu an siamṭha a. Hetah hian a hmaa lo awm sa chu tidanglamin ‘sovereignty and integrity’ chu an dahlut ta a ni. Hemi chungchangah hian India Danpui hnuaia duh duh sawi theihna chanvo kan neih chu hrek tel a ni.

India ram bung tikehchhe thei zawnga thusawi phalna chanvo kan neih chu hrek theih a ni ta chiah a ni. Hemi rual hian MLA leh MP te reng rengin thutiam (oath) an lak turah ‘sovereignty and integrity of india’ (India ram hi ram dang hnuaia kun lova mahni a thuneihna pumhlum neia nihna leh India ram pumkhatna) vawng nung turin thutiam an siamṭha ta bawk a ni.

Hei mai bakah hian hriat tur pawimawh tak mai chu Parliament-in India Danpui a ‘freedom of speech and expression’ ah ram inpumkhatna chungchanga duh duh sawi theihna chanvo hrekna a lo siam belh tawh zulzui-in Unlawful Activities (Prevention) Act, 1967 a siam a. He dan hian a hnuaia tarlan ang hian ram bung tikehchhe zawng leh ram satthla tura hmalak leh thusawi te, chutiang ti tura midang fuih te chu ‘dan bawhchhiatna’ (criminal offence) a ti ta a ni:

Mimal emaw a huho/ pawl angin India ram bung pumkhatna tikehchhe zawnga chet lak emaw thusawi emaw chutiang tura midang fuih te, India ram bung satthla a midang kuta pek (cession) emaw inla hrang (secession) tura chutiang lam thil thlawp emaw chetlakna te hi ‘unlawful activity’ a ni. (Sec 2 (1) (o) Unlawful Activities (Prevention) Act, 1967 as amended)

A chunga tarlan tak aṭang hian ‘secession’ atana hmalakna chu danin a khap a, dan bawhchhiatna a nih dan te, MLA emaw MP tan phei chuan an thutiam (oath) bawhchhiatna a nih dan te bakah India danpui hnuaia Parliament-in India ram bung pumkhat aṭanga ‘inlakhran’ (secession) chungchanga kut a thlak theih loh dan te kan hmu ta a ni.

Secession kaihhnawihah hian, ‘Right to self determination’ chungchang sawi rik a awm bawk a. India chuan hemi chungchangah hian declaration siamin ‘right to self determination hian ramdang hnuaia kun te chauh a huam a, sovereign independent states te emaw ram khata mi ṭhenkhat emaw hnam ṭhenkhat bil chauh a huam thei lo’ tiin a dinna a lo tarlang tawh bawk a ni. (‘Where does India stand on the right to self determination?’ Stinivas Burra, Faculty of Legal Studies, South Asian University, New Delhi)

Private member bill pu lut tur hian thla khat hriattir lawk a ngaih bakah House Secretariat-ah te dan behchhana endik tur a ni a. (Private’ efforts at legislation: How they are made, how often they succeed, PRS Legislative Research) Unlawful Activities (Prevention)Act, 1967 in ‘unlawful activity’ tia ‘dan bawhchhiatna’ a tarlan atan Parliament a bill pu lut tur hian kawng a ping bawk khawp ang le.

Dan pawnah hian rum nek emaw politic a pawng nek hmanga inlahrang (secession) tura beih chu nise thu hran a ni ang a, chu pawh khua rei thilah inher rem thei tura mi ṭhenkhat lunglen zawng ni mah se 'dan hnuaiah' chuan a kawng a kaw hrih lem lo. ‘Constitution hnuaiah’ ti si tan chuan zirchian hmasak deuh a ṭul awm e.

Hetiang chungchangah hian thu dik ziktluak lo hmanga mipui nawlpui thluak suk a, mi rilru hruai pen vak theih a nih avangin fimkhur a ngai hle mai. A hre zawk leh thiam zawkten an rawn sawi zui atan i duhtawk phawt ang.

Vanlalruata Royte