Kaisara ṭhian (Johana 19: 1-15)

Johana 19:12 Chu mi achin chu Pilatan thlah a tum a; nimahsela Judate an au va, “He mi hi i thlah chuanin Kaisara ṭhian i ni lo vang; tu pawh lala insiam apiang Kaisara do an ni,” an ti a.

Zoram darthla­lang: Mizoram hi Tuipui ral aṭanga Krista Chanchin Ṭha eng hmanga hruai kan ni. Krista taksa, mita hmuh theih Kohhran hmanga enkawl a, venhim a ni tih hi khaw tina hmun rem leh ṭha lai bera Biak In kha, khaw khata in ṭha ber a nih lai hun khan a tichiang hle mai. Kohhran hote ṭawngṭaina kut aia sumpai leh therhlo hmanga ram rorelna fung chelh tuma a thim a var pawh thlu lova ṭangte hi Kaisara ṭhiante chu an ni.

Chhechhawnga te Vaidawr: Kaisara ṭhian nih loh hlauin, Party Politics tuinu tak hmangin kum nga danah, sumpai leh therhlo kan in puanhnuai siak a. Election te hi candidate te thau sawhna hun ṭhaah kan ngai a. Kan kut (vote) hmangin mipuite hian kan ram hliampui tawrh hi kan khawih pûn sak avangin a pân zual zel a ni.

Bakchhe len hun: Chungleng leh hnuaileng indo lai khan, a boruak thlir ranin Bâk chuan ṭan hmun a thlak sek ṭhin. Inthlan dawn apianga lawmluh tur awm zel te hi mak ka ti ta lo ve. Kaisara ṭhian leh ṭhian an in hre chhuak thar a ni mai. Rorelna hmuna dikna leh rinawmna din tlangpui ngam lo khawpa thutlukna dik lo siam ching an tam a, duhthlanna dik siam huna duhthlanna dik lo siam pawizia te hi aw.... ât huai kan ni ngei ang.

Kaisara chu tunge?: Kaisara tih chu Rom lalte hming sawina (surname) a ni. Gaius Julias Caesar (BC 100-44) hming aṭanga room lalte nihna (title) atana an hman zui tak, Rom lalte hming sawina (surname) a ni. Pilata hun laia Rom lal (emperor) hi Tiberia Kaisara (Tiberius Caesar AD 14-37) a ni.

Pilata khan kan Lalpa Isua Krista chu, mi dik leh thiang­hlim, sualna nei lo a ni tih hriain, rorelna dik kenkawh duhin tum mah se la. Kaisara ṭhian nih loh hlauh vanga Isua Krista hnawl a, thiam loh chantirtu, Pilata kut tichaktu chu mipuite kha an ni.

Tunah inthlan chu kan zo fel leh thawkhat a ni a, ropuina lem inbel turin tute nge kum nga Kaisara ṭhianah kan siam leh dawn le? Tuna chinah chuan "Min ṭanpuina tur chu Lalpa, lei leh van siamtu hnena a mi lo thleng ang" (Sam 121:2) tih au chhuahpuina turin hlawkna lam ringawt thlir tawh loin dikna i ṭan ṭhin ang u.

Rev Lalhmuchhuaka