AN HÉK LEH NGAM DAWN EM?

Serchhip bial By-Election neih a ṭul nachhan, MNF MLA 12 te'na an hek avanga MLA aṭanga paih lo ngai ta hial. Ziak dàn hmanga Anti Defection Law bawhchhe tu, Pu Lalduhoma an hék ang hian MNF MLA 12 te hian, nasa taka ZPM Party Campaign puitu, Indepen­dent MLA rualte hi hékin; Speaker zahawm tak leh rotháp tak, Pu Lalrinliana Sailo hian a ban leh ngam dawn em?

India ramah dàn chunga léng kan awm lo ti fo ṭhin mah ila, a neinung zawkte leh nihna sáng zawk na ná nà chuan thil chu an lo ti thei deuh tih a lang reng mai. Tuirial Hydel Project chauh thlir pawh hian a thiam lo zawk thiam chantirna khawvel a nihzia ka chiang ve tlat. Hei erawh min zawh belh suh u. Ka sawi thui lovang. A tira ram nei lo khan tunah chuan ram an nei fel vek tawh.

Dán hi a zahawm a, Lalber se kan duh a, Pu Lalduhoma, Serchhip bialtu MLA ni ṭhin pawh bàn a lo nihna chhan dik tak a nih kha. Serchhip bial By-Election 2021 nei tura inbuatsaihna a kal mek laiin Independent MLA te'n Serchhipah ZPM tan nasa takin an Campaign mek tih kan hmu a. Pu Lalduhoma an hék a, an ban dàn ang chiaha khawsa an ni lo em ni? Kan ram roréltute, dán chu dàn a ni ti tute kha khaw nge in awm zawh ták?

Independent MLA te hian, "dán hmanga hék theih ni mah ila, MNF MLA te hian min hék ngam tawh dawn chuang lo," tiin, an che lui vak zawk nge? MNF MLA te hian, "tuna kan hék a, ban tir an nih leh chuan Serchhip mipuiin min vote loh phah vek ang," tia hék rih lo zawk. Engpawh nise, dàn chu a huna hman tur a ni dawn lo em ni? Duh dan dana nghah (delay) chi a ni dawn em ni? Khaw nge MNF MLA rualte kha in awm ták? "Dik chu dik, dik lo chu dik lo," in ti leh ngam dawn em?

Mizoramah thil eng­emaw a rawn lar hluai a. Entirna atan chauh Sangha Bomb, 1:45pm, Traffic Jam (TJ) leh Sorkar Official vau (silai hmeh puah tum tlawlh) tih ang reng, thil chi hrang hrang a rawn lár hluai a, thla 1 ém pawh a awh zo ngai mang lo. Reiloteah a reh leh ṭhuap zel mai a nih hi.

Tunah lah Inde­pendent MLA te'n ZPM tan nasa taka an cam­paign pui thawm kan hre leh bawk a. Ti hian a ri hluai ang a, reilote ah a reh leh mai dawn em ni? Khaw nge dàn (law) chu? Thu neitu­ten han ngaihtuah rang teh u.

Mizoram mipui hian vei tur dik kan vei a, thil dik lo chu hneawm khawpa auchhuahpui reng a hun tawh tak zet a ni. Mipui sorkarah mipui kan au loh chuan tu nge au se kan tih? Kan ṭhenawm Burma ramah Democracy chhuhsak an nih avangin a ni lo'm ni ram tan nunna an chàn ngam?

Zaa za Kristian ram inti zawk hian ram tana kan tawn ngam chin hi a tlem lulái em mai. Nunna chán chu sawi loh, thudik sawi avanga mi huat nih mai mai te kan la hlau a. Kan rights kan hriat a, kan ram leh hnam tana thih thlenga kan din ngam a hun ta e. Ṭhalai, i ramin a ko che.

David Zochhuanmawia (Vida Hrahsel Saza)