AMC hmalakna a langsar
Tunhnai deuh aṭang khan Aizawl Municipal Corporation (AMC) chuan Aizawl khawpui chhungah chi hrang hrangin hma a la nasa a, heng an hmalakna hi a langsar hlawm viau a, mipui pawhin kan chhawr chho mek zel a, mipui tan han ṭang sauh sauh teh se.
Hun engemawchen aṭang khan kawngpui zauh ngaihna awm tawh si lo-ah side drain chu hmun tam zawkah concrete-in an khuh a, a ṭhenah thir an hmang a, kawng zim lutuk pawh a tih ziaawm phah em em a, a lawmawm takzet a ni. Tunlai hian footpath siamṭhat hna a thawk leh mek a, hengte hi kea kalte tan a lawmawm lehzual hle a ni.
Tunhma aṭang tawh khan contract hna hi party mite induhsakna ber a ni ṭhin a, a la ni reng dawn pawhin a lang. Hengah hian a petu lam ai chuan a enkawltu (monitoring cell) engineer-te an pawimawh viau mai. Chaltlang chho-a footpath awmsa kum tam pawh la ni lo, a thara siam ngai angte hi contractor mai bakah engineer-te enkawl ṭhat loh vang a ni chiang hle.
State sorkarna chelhtu emaw, AMC-a a chelhtute chu tu pawh ni rawh se, mo nitoring cell-in uluk leh strict taka an enpui lohna hna chu a hnu lawkah a chhe leh vat ṭhin. Chuvangin, contract hna reng reng chu a viltu engineer-te an pawimawh viau a ni. Engineer zawmthaw leh therhlo beiseitu enkawl hna chu rei a daih ngai lo a, thawmṭhat a ngai leh vat ṭhin.
AMC hna chauh a ni lo, PWD hnuaia kawng siam leh building sak te, culvert leh retaining wall siamah te thlengin engineer-te hi an pawimawh a, hmanraw hman leh an hnathawh uluk taka an vil loh chuan a tlo lo hle ṭhin a ni. Tuna AMC-in footpath an siamṭhat leh mek pawh hi AMC sorkar lo chelhtute hna pek vek a ni a, hna petute ai chuan a thawk tak taktu contractor emaw, a viltu engineer-te mawphurhna a lian zawk turah a ngaih theih.
Tuna AMC-in Aizawl khawpui a chei mekah pawh hian hna petu politician ai chuan a viltu ber engineer-te an pawimawh tih hi kan lo hre ve a, kan lo vil pui ve kar zel tih hi engineer-te pawhin min lo hriatpui se. Budget mil tawk a ṭha thei ang bera hna thawh ṭhin ni se a duhawm ngawt mai.
Lal Rinmawia