INSUM A HAR ṬHIN!
Dated 14th - 15th April, 2019, Aizawl. Tukin Aizawl Post leh Vanglaini chanchinbu kan bih a, hetiang hi an lo ziak dum kuau a.
‘Mizoramah zu zuar leh dawn - May 27, 2019 thleng zu zuar leh turin High Court-in sorkar a hriattir - Assam sorkarin Mizoram chhungah Kawngpui siam lo - SDO (C) Vairengte’
Zu Imports - November 2018 aṭanga 26th February, 2019 thlenga Mizoram sorkarin zu lakluh phalna a la pek zawm zel vangin Bonded Wirehouse neituten stock an la ngah a, chu chu High Court in tihral phalsak turin Mizoram sorkar a hriattir leh ta a ni.
Ti hian sawi ila, MNF sorkar hian zu kan khap tiin Christmas dawn aṭangin Dry Day - Dry Month te kha an puang a. RV lamah Excise Duty Post te an hawng thar a. Assembly-ah Bill tharte an pass bawk a. An ṭawngkamah an rintlak hmelin, Kohhran lamah pawh an hmai a uang viau.
A thlamuan thlak e, thla thum/thla li lek hmalakna mah mah, in ti chiam chiam teh ang. Mahse, mipui hriat lohin a khurpui lamah pipe lian puiin an lo la connect ngur a, Mizoramah a rawn khawh lut huau huau a, lak luh (imports) lamah ṭhahnem an ngai hle a lo ni.
Tichuan, stock lamah kan hnianghnar ta em em a! Tuna kan zu buaipui hi MNF sorkar thar zu lakluh vek a ni tawh e, ti awm se, hnial hneh an har fu ang. Zu in mite tan erawh ṭhahnemngai taka ṭan lak leh a ngaih hmel. Chanchin lawmawm pawh a ni tel ang a, inbual nan hmantlak si hek lo le.
Bihar-ah chuan zu stock chinfel nan Bull Dozer an ruai mai asin maw le. Sorkar hian zu a do tak tak a nih chuan Supreme Court pawh a awm e, min lo dem teh suh, mipui lama zu kan khap bur dan, kan control - Dry Day, Dry Month, Free Sales chur chur leh si policy vel zawk hi a ni, mak ka tih em em bawk chu!
Vairengte SDO (C) hian Mizoram leh Assam ramri chin a hre thei hi mak ka ti?! Helai bawr hi Inner Line Forest Reserves (ILFR) chhung vek a ni. ILFR hi tu tan mah ramri a ni lo. India Independent hnu hian Assam leh Mizoram inkar ramri (Boundary) hi ziah fel emaw kham fel a la awm ngai lovin ka hria.
British hunah kha chuan Suakpuilala leh British sorkar khan inremna boundary an siam Mizote hriat ve loh a, ramri siam a lo awm chuan thuhran. Official kan ni emaw, media/ journalist kan nih pawhin hnam tana awk hnawk zawng hi chuan ṭawng leh ziakah fimkhur teh ang u.
Lalrozara RZ