MNF Press Release leh Assembly Speaker Banglaa thil thleng kha
Mizorama roreltu Mizo National Front, General Headquarters-in official Press Release an chhuah, Lalthanzuala Hnamte, General Secretary, Media & Publicity Dept-in Memo No.MNF/Media/02/2021/211 Dt. 25.03.2021 hi ngun taka chhiar zui bakah chhui chian ngai a ni a, sorkar rorêlna tiderthawng thei khawp leh sorkar inkaihhruaina thlenga nghawng thei ni si hi sawi zui mang lova a zuih ral leh mai mai chuan Mizoram hian hun ṭha lo zawk a tawh a hlauhawm avangin phak ang tawk tawka zirchian na hi dan hre mite cho chhuahna atan tarlan hi a ṭha in ka hre tlat a ni.
MNF thuchhuah chuan, 'SAWRKAR HMUN HLU NA TAKA HUMHALH NGAM SPEAKER PU LALRINLIANA SAILO CHHUANAWM' tih thupui-ah an hmang a. A humhalh dan kimchang ziak lo mahse an thil ziah chinah hian zawhna a tam hle a ni. He thuchhuah siam hma hian Congress chuan Press Release an lo chhuah tawh a, Assembly Speaker hi silai hmeh puah tuma lek chhuaka PWD hotute vau ah an lo puh tawh a ni.
"Mizoram Legislative Assembly Speaker Pu Lalrinliana Sailo-in sawrkar hmun hlu tâk... sawrkar hnathawkten a tichhe zawnga kut an thlak mek na taka a humhalh ngam hi chhuanawm kan ti a, huaisen pawh kan ti hle" an han ti tawp mai a. Sawrkar hnathawk te enkawltu MNF sawrkar an nih bawk si avangin thil inkalh lian tak chu a awm nghal phawt a, kan ruling party ngei hian sawrkar hnathawk te a sawi dan hi a mak khawp mai.
MNF thu chhuah kal zela, "Ti tawh lo tura vawi sawm chuang a hrilh hnuah pawh Speaker thu hi ngai pawimawh duh chuang loa an tihluih zel avangin, Mizoram tana hmun hlu humhalh a ṭul a tih mai bakah, Speaker zahawmna humhim a ṭul bawka a hriat avangin, officer-te hi koin a na takin a sawi ta a ni"an han ti ta mai hian Speaker chet dan hi an rawn puang zar ta zawk a tih theih a, Speaker hian "na takin" a sawi tih hi a na thawkhat ngei ang tih a rinawm na chu, Speaker in PWD hotute a hrilhfiah "pawh ṭi lova MNF thuchhuah zawkin Speaker sawi nat zia an rawn finfiah ta tlat mai a, a sawi na thawkhat chu a ni ngei ngei ang.
An thu kal zelah hian MNF hian PWD hotute hi sum an hman danah mawi lo takin an puh a tih loh theih lova, "Tunah hetia department officer-ten sum chuangtlai bel ral nana hmun hlu tak tichhe zawnga hma an la hi MNF chuan ṭha a ti lo," an ti ta tlat mai a. Covid-19 avanga pawisa indaih lova mipui aṭanga an khawn lai hian CM enkawl Department ah ngei zawk hian "Sum chuangtlai" a awm tih an rawn fin fiah leh nghal tlat mai a, Opposition lam puhna pawh ni lova MNF ngeiin PWD hnuaia "Sum chuangtlai" a awm thu Mizoram hriata an puang hi Chief Minister hian eng ang takin ngai ang maw?
PWD Engineer, Mizorama engineer ṭha rual fuan khawm hi sum chuangtlai bel ralna zawng mai mai ṭhin an ni ta niawm takin MNF Press Release ah chuan MNF sawrkar lai ngeiin a lo chhuak a ni.
C Lalremmawia