TUNGE LUNG CHU LUM SAWN ANG? (Who will roll the stone away?)

Good Friday leh Easter Sunday chu kan hmang zo ta a. Easter tih hi German ṭawng aṭanga lak a ni a, tho tihna a ni awm e. Mari Magdalin leh a ṭhiante chuan thlan lamah Isua ruang hriak rimtui hnawih tura an kalin “”Thlan kawngka ata lung chu tuin nge min lum sawn tiin an ngaih” (Marka 16:3) tiin an sawi a.

Mizoram dinhmun (context) aṭanga Lal Isua thawh leh thu ka chhiar leh sermon ka ngaih thlak aṭangin tuinnge Mizoram delh bettu - Retheite retheihna(Poverty), Intodelh lohna (Economic dependency), Diklohna (Injustice), Inawpbehna (0ppression) leh Social problem chi hrang hrang- kan khawtlang kharkhiptu lungpui hi tuinnge min lumsawn sak ang aw, tiin ka ngaihtuah a.

Retheite retheihna: Ni 1 April 2021 zan khan kan khua ami pa pakhat cancer natna avangin a thi a, cancer hospitalah kan buaipui a. Ka naupan lai aṭang tawhin an chhungkaw retheihzia te ka ngaihtuah a, retheihna salah an tang tlat hian ka hria. Ka ngaihtuah zela hetiang hi social scientist hovin “culture of poverty” retheihna nunphunga nei tlat te din hmun an tih ṭhin hi ni hian ka hria a. Hei hi slum dweller ho, tea garden a cheng ho harsat hi a ni. Retheihna aṭanga tal chhuah aiin retheihna hi nunphungah an nei tlat a ni. Kan ramah hian mi tam tak chu retheihna bawiah a awm tlat a ni. Hei hi a pawi in a rapthak em em a ni. Tunge he lung hi lum sawnsak ang?

Dik lohna (Injustice): Dikna tundin tumin politics ah ka zuang lut ve a. Ka thil hmuh chhuah chu kalphung diklo (unjust-system), dik lo pawisak lohna, a dik lo a ni tih kan hriat chian em em, mahse haidera pawisak duh miah lohna, diklo nunphunga neihna (structural sin) bawiah Mizoram hi khar hnan in kan awm mek a ni. Tunge he lung hi lumsawn ang?

Intodelh lohna (economic dependency): Retheihna karah kum 1966 thleng khan kan intodelh ve a. Rambuai (MNF insurgency) aṭang kha chuan intodelh ni a awm ta lo. Mizoram chu kutdawh State-ah kan siam ta a ni hi. He lung hi tunge lum sawn ang?

Pathian ṭanpuina lo chuan Zoram min kharkhiptu lungpui hi kan lumsawn dawn lo. Lalpa ṭanpuina dawng tur chuan a duh zawng sawi chauh ni lovin, a duh zawng kan tih a ngai a ni. Zoram hi thawhlehna thiltihtheihnaa kaih thawh a nih theih nan Lalpa mi hriat, a hmanrua, Lalpa duh zawng ti tur kan mamawh a ni.

Kan pa van a mi I hming zahawm rawh se, I ram lo theng rawh se,

I duh zawng vana an ti angin lei min ti rawh se.

Rev. Dr. K.Thanzauva