A RUH NO NO CHHUAKAH

Kan naupan lai chuan ṭhiante nena kan pawnto changin lam ṭang kan insiam a, naupang pawnto in an tih ṭhin ang hi chu kan ti ve thei mai zel a. A changin kan inhrui pawh a, a changin kan inkhel a, mipa game bik awm lovin inkawibah lamin kan ti thei vek zel. A chang leh kan inbuan a, chungah chuan a ruh no na na na chu kan hriat leh nge nge zel a, kan per leh lawp zel.

Hun a kal zel a, kan nun hlui te chu kohkir rual lohvin kan vuiliam hnem ta. Vuiliam ve theih loh thil pakhat awm erawh chu kan naupan lai aṭanga kan ṭawngkam hman lar em em 'a ruh no no chhuakah' tih hi hman aṭanga

ṭawng kauchheh awmsa ni mah se, tun thleng hian a la hlui ve thei lo. Kan khawvel hman mek ngaihtuah leh kan ram dinhmun ngaihtuah neuh neuh chungin he ṭawngkam dikzia hi ka hre fiah telh telh a. Hnathawhna kawngah pawh a ruh no zawk chu kan dawng leh zawk zel chu a nih hi.

Khai mah aw! veng pakhata welding machine dawr ka hmuh chu ṭhiante sawi aṭangin a rei tawh thu ka hria a. Chu dawrah chuan hnathawktu pawh an awm ve nual mai, chu dawr chhunga hnathawh kawr ha tam zawk chu kan ṭhenawm

ṭhalai vai an ni. An hna a ṭhain an ti tak tak a, kawngpui bul maia thir vuak rik dum dum te, welding machine hmanga kah en zuai zuaite kha an zak miah lo; nuam an ti zawk hial niin ka hria.

Mizo ṭhalaite mamawh em em pawisa tam tak an thawk chhuak a, Mizo ṭhalaite zingah welder nih hlawkzia inzirtir kan tum mek laiin Silchar lama kan unaute chuan kan ramah ngei eizawn nan an lo hmang der tawh mai.

Chhinlung chhuak Zofate hian run lui kan lo kan chuan kan kutah tuthlawh leh chempui bak hum tur kan nei lo. Tunah zet chuan kha kan kut ngeiah khan khawvel kan keng va va tawh a, kan hmasawnna tawngbuak hi a tam mah mah em ni? Kan ram kan tih ve tura kan pi leh pute’n harsa taka an lo sahchhuahah hian kan tan hnathawh tur a tlem ta hle mai. Mahse, hnam dang tan chuan hna ṭau a ṭet a ni lo chauh si a!

Engtin nge kan hnuchhawn tak, ei leh bara intodelh ngai sang nun, mite kep nih ai chuan nghei mai pawh duh zawk nunah khan kan let leh thei ang? Kan tlai ṭan tawh mah se, kan la tlai chhe lutuk lo ve. Mizo nula tlangval tlawmngai, taima, hnathawh hreh nei lo tia kan sawi ṭhinte kha kan pi leh pute an ni tih hre rengin intodelh duhna thinlung pu thar leh ila, hna sang leh hlawh tam takin min daih vek thei lo, kan taimaka thawh hreh kan neih loh chuan ei hmuhna khawp chu kan ramah hian hna a la awm asin.

Tunah hi chuan hnathawhna lamah kan ruh a no em avangin, kan kawtkaiah hnamdang tlangvalte nek chhuakin kan awm mek chu a nih hi. Social media-ah hian kan thawmhnaw neih ṭhat ber nena kan thlalak ni lovin, kan hnathawh kawr nena kan thlalakte hi upload ve tawh teh ang u.

Kan ramah hian hnathawh hreh nei lo tan post a tam ber a, chu mi line-ah chuan Mizo ṭhalai kan tlem ber thung. Degree neih thar avanga sawrkar hna ruak awm hmasa apianga MPSC office-a dilna form lachhuak tur a insulpel zut zutte hi a hnu thla hnih thumah chuan hlawhchhamna kawnah rual dial dialin an kal duh khawp asin. Sawrkar hna thawh a ṭha lo ve ka ti lo, tun dinhmunah chuan kan indaih rih lo a nih hi, thawh hreh nei lo tan post sang chuang a awm reng a, hnamdang ṭhalaite’n min luh khalh leh ṭhin. Kan ram ngeia hnamdang ṭhalaite aia kan ruh a no zawk ta fo hi a hnam ang pawha kan in enfiahna tur chu a ni dawn lawm ni?

Nu leh pate pawhin kan fate hi hna­thawh zirtir uar sauh sauh ang u. Nu leh pate u kan hrilh ru ang che u, tunlai ṭhalaite buaipui em em mobile game Player Unknown’s Battle Grounds (PUBG) avanga inchhungkua inbuai tawh chuan kha game khan a luhchilh chhung che u chuan inhlawhtling ngai lovang. A chhan chu maw raldo tlangau lung lung hian ral an kap thlu ngai lo, ral a hmuh hmain a mah kha an kap thlu hman daih ṭhin. Mite sawi danin he game pawh hi Mizo ṭhalai te’n kan atchilh viau rualin hnamdang ṭhalaite bawk kan ngam ṭhin lo a ni awm e, tak tak nimaw?

Nulate u, kan tlangvalte hnathawh kawr ha hi lo ngaisang lul teh u. Aw tlangval, nula feng chhing nazawng kha ngaisang suh, an zing tho hmel leh chawhnu hera an hmel kha a danglam teh a nia. Social media-ah kan ruh a no tawh lo, hnathawh lamah erawh kan ruh a la no hle si; hnathawh hi kan uar a ngai, nasa lehzuala kan inzirtir a ngai e.

Kan thawh peih lovah hian hnam dang ṭhalaite’n a nuai tel an ramah an phur liam vut vut a, eng kan ti ta bik nge kan ramah meuh pawh hnam dangte aia a ruh no zawkah kan ṭan tlat mai le! Mizo nula, tlangval te u, thlan tui far nan Zoram a zua lua e, hnathawh kawr nen hmalam i pan ang u.

Ramchhana Hmar, Phuaibuang