TÛ KAH NGE?

Kan naupan laiin kan khua Reiêk-ah sakei nghal tak mai a lo tlâ a, ran a seh fo mai a. Pasalṭha pakhat, Kohhran upa ni bawk hovin kar kam an rawt ta a. Chu pasalṭha chuan sakei hnîak aṭang chuan a len dân tur tâwkte a chhût a, a duh ang takin khawchhunga silai rinawm ber nia an hriat hmangin kar chu an kam ta a.

“Heti chuan a bek takah a kâp ang,” a ti a. Nilai zan inkhâwmah chu pasalṭha chuan inkhâwm a hruai lai takin silai a ri ta dur mai a, “Chu le!” a ti a, amah pawh chuan tlân a chuh nghal ta mai a! Pâho leh tlang­vâlte chu inring reng an ni bawk a, rang takin meichher chhîin kar kamna lam chu an pan sung sung a.

Tleirawl harh, huaisen leh chak tak mai hi a hma berah a tlân a, a hnung lawkah vâl upa pakhat a tlân bawk a. Kar kawtah chuan sakei chu a lo tlu dêr mai a, pasalṭha sawi ang ngei khan a bekah silai mupui chuan a lo verh siah a, hnîak phâwi lêk lovin a lo thi dêr a.

Tleirawlin a lu zu man a tum lai chuan a hnunga vâl upa chuan fing takin, “Kha, a la chêin ka hria, fimkhur rawh,” a rawn ti a. Chu tleirawl chu a han ding hlek a, chutih lai tak chuan vâl upa chuan a rawn tlankhalh a, sakei lu chu a zu vuan a, “Ka chiang e,” tiin a au va, chu sakei chu a kah-ah chhiar a ni ta mai a, a lu pawh chu a chang ta a. Chu tleirawl erawh chu a hawihâi ta dêr mai a.

Chu sakei chu tu kah nge ni ta ber le? Silai neitu kha a ni zâwk lo maw? Pasal-

ṭha a kar kamtu kha a kâptu ni âwm tak? Finrâwl chhuah paha khawtlâng dân ang taka a chêt vangin vâl upa khân ‘kâptu’ nihna a chang lawi a. Kha tleirawl kha a lainatawm hle mai a, a hmasa bera tlân, tuemaw fin a chelh loh vanga hmingṭha a chang ta lo chu khaw­ngaih thlâ a la a, “Ani zâwk hi a kâptu nih chang rawh se,” tih mai âwm - mahse dân anga mantu chu vâl upa kha a ni miau bawk si, tumahin an chuh­pui thiang tawh lo.

A nihna takah chuan a kâptu chu Reiêk khua an ni. A hnua midangten an sawi leh pawhin chumi khami chuan sakei a kâp an ti lo, “Reiêk khuain sakei an kâp,” an ti zêl tawh zâwk a ni. Ramhnuaia la kal chhuak ngai lo naupangte pawhin, “Kan khuain sakei kan kâp,” tiin a kâptu ang hrimin an lo inti thei ve tawh mai a ni. A kâptu nih (credit) hi inchuh a lo awl hle zêl mai.

MIMER hi tu Party sawrkâr din nge? Lêngpui Airport hi tu pâwl ruahman nge? Bairabi-a rêl lo lût leh Sairâng thlenga lo lût tur hi tu Party sawrkâr hmalâkna nge? Serlui Hydel Project hi tu ruahman nge? Mizoram sawrkâr hmalâkna vek an ni tihah hian lungâwi ila, inhnialna a awm lo tûr.

Chutih lai chuan a chhe lam chu a fawmtu nih tumahin kan duh lo. Rêl kawng lo lût hi nakinah hnawksak riauin hre ta ila, mawhphur ngam an awm ang em? Leilâwn a chim chuan mawhpuh tur kan zawng a, “A bul aṭangin kan lo tifuh tawk lo a ni,” tia mawh phur ngam chu kan vâng hle.

Kan ram inawp dânah sawrkârte chu inthlâk reng an ni a, an hmaa mite kuhmûmah an pâr châng a awm ang a, an hnunga mite then fai tur engemaw zât chu an hnutchhiah ve ngei bawk ang.

Lalchuangliana