CHENG 300,000 (SEDP) DAWN TUMTE TAN BEISEI TUR AWMIN A LANG LO!

Kum 2018 MLA thlan dawn khan tuna kan CM Pu Zoramthanga hian," MNF kan sawrkar chuan chhungkaw tinin Rs 300,000 aia tlem lo in dawng vek dawn, NLUP lo dawng tawh te pawhin Project in siam chuan in dawng leh vek ang," tiin Zoram mipuite min tiam chamchi a. Hei mai bakah Pu Zoramthanga hian "Kan budget hi a chi tur a ni a, nasa takin kan ti pung ang," tiin min tiam bawk ṭhin.

MNF Party chuan sawrkarna hneh takin a siam ta a, budget hmasa ber 2019 - 2020 ah khan SEDP atan cheng vaibelchhia 750 dah a ni a, 2019 kum khat chhung khan Mizoranah Covid- 19 hri a leng lova, India ram pawhin harsatna a tawk nasa lo.

Mipui beisei dan chuan vbc 750 aṭang hian nuaithum sem tura beisei a ni a,mipui hnena sem chu sawi loh he pawisa hi kawngsiam nan te, Zirtirtu hlawh leh Sport dept etc, te tan hmanral a ni zawk. Kan CM in a chi atan a tih pun tur tia min lo tiam chu tipung lovin a hmangral ta a ni.

Kum 2020 - 2021 budget pharh anih leh khan kan CM Finance Minister ni bawk hian SEDP ah vbc 513 a dah kha tipung chuang lo leh nuaithum sem lovin Covid-19 a chhuanlam ta a. Kumin March budget session (vawi thum budget a pharhna ah chuan) SEDP atan vbc 400 a dah leh ta a, hei pawh hi mipui ah nuaithumin a sem beisei ngam chi a ni tawh lo a tih theih awm e.

Covid -19 hrileng a chhuanlam leh ngei a rinawm bak­ah Covid-19 hri a len hma a SEDP atan a vbc 750 a dah pawh semtur nei lo khan sum leh paia harsatna namen lo a tawh hnu hian nuaithum hi engtinnge a sem theih tehlul ang. SEDP dawn in beiseite tan beisei ngam chi a ni ta lo e.

H. Lalṭhazuala, Aizawl West III