KAN PIANGSUAL

Tuna kan ramin har­satna tam tak a tawh lian tham heng: Kristian ram nia inchhal chunga chawmhlawm state kan nih reng te, eirukna in nghet taka bu a khuar te, in leh in lem lo te pawhin zu kan rui luai luai te, drugs leh thatchhiatna leh changkanna suak inpawlhin ṭhalaite min phuar tlat te, kan chhehvel hnamdangte avanga kan buai kum tin te hi kan tihtur kan tih loh avanga kan lo piansual tak vang a ni.

Ram leh a hnam pum anga piansualna hi, a chhan ber chu mitin te'n kan tih tur kan tih tawk loh vang a ni.

Mi tin hian kan duty hi dik takin ti ila kan buaina tur tam zawk hi chinfel theih a ni. Kan ram budget tam zawk sawrkar hnathawk tan leh an inrelbawlnaah a kal a, a tlem zawk hmasawnna hnathawhna atan hman a ni. Sawrkar hnathawkte chu tlin taka enkawl an nih avangin an hna pawh tlin taka thawk a, an mawhphurhna pawh hlen chhuak zo tura ngaih an ni.

Chutihlai chuan, ruihhlo do tura sawr­karin hlawh tam taka a rawihte hian ruihhlo an do hneh lo a, SRS din a ngaih phah a, hetiang hi thil ṭha a nih rualin sawrkar tan mualphona a tling. Tin, hlawh neia sawrkarin a chhawr ho khan engnge an lo tih? Chhungkua chhuahsanin hlawh nei lo lehnghalin zan khaw tai rek thleng thlengin an duty a ngai a, an chhuahsan an fate an van ngaihtuahawm em! Helaiah hian thil kal sual leh a nih dan tur anga thil ni lo chu a awm a, hnam pum huapa piansual theihna thil a ni.

Ramri chung­changa Assam kan ngam loh chhan chu ei leh bara kan intodelh loh vang a ni. State kan nih aṭanga kum 30 a liam hnuah pawh chawmhlawm kan la ngai reng mai hi, kan ram hi mihring chu nise chuan zeng emaw rilru lama rual ban lo emaw a ni ngei ang. Kan hmasawnna tur atana aiawha kan thlante hian an duty an hlen lo tihna a ni mai! Chu chuan ramri chinfel ngam loh thlengin a nghawng!

Eirukna in nghet takin kan ramah bu a khuar laiin ei ru man leh hrem kan hre ngai si lo. Ei ru ni ngeia lang pawh nise man leh chhui a hnekin kohhran leh khawtlangah kan chung en chu a ni ta zel a; hetah pawh hian felhlel a awm a ni.

Mipuite pawh khua leh tui ṭha kan nih ve a ngai. Mipui dik chuan sawrkar dik an nei mai a, mipui dawihzep leh hlemhle lutuk chuan an phu tawk sawrkar an nei ve mai. Thil dik ti tur leh kan ram piansualna lak aṭanga damna pe turin mipuiten a ṭha lamah sawrkar thlawp ila, a kal sual tur veng a ni. Sawrkar kalsual tur veng ngam tur khawpin kan dikin em tih erawh kan in en ve a ngai ang.

Mitin hian kan tihtur hi uluk takin ti ang u. Rawngbawltuin uluk takin rawng bawl se, sawrkar hna­thawkin dik takin thawk se. Rorel hna leh dan siam hna thawktute pawhin dik takin ti se kan ram leh hnam a dam ang a, kan piansualna lak ata kan dam leh ang.

Ramengi Pa