Hriatna zau neih tum ila

Zirlai leh hna zawng mekte tana tih makmawh chu General Knowledge lama hriatna zau nei tura ṭan lak a ni. Rin aiin zirlaite hi GK lama an hriatna a zau lo viau mai. College rap pha chinin an hriat tura ngaih te hi han zawt i la, an hre lo leh tlat ṭhin. Mizorama zirna in sang ber, Mizoram University-a Vice Chancellor hming te hi han zawt i la, BA/ B.Sc zirlai zingah hre lo an kat nawk mai. A zialo lam deuh a ni.

General Know­ledge hi subject dang anga zir vak chi a ni lo. Ngaihven a, tui chilh a ngai. A tira tui sa tan lo pawh intih tui chawp theih a ni. Nitin khawvel emaw India rama thil thleng pawimawh pakhat tal chhinchhiah ṭhin turin ka chah ṭhin. Chumi atan chuan note bu hran nei tur leh thil thleng (event) pawimawh pakhat tal ziak ṭhin turin ka ti a, an zawm lem lo. Zawm ngat se hna zawnga an exam hunah a hranpaa GK zir a ṭul lo tur.

Tui chilh laklawh chuan GK hi thil nuam tak a ni. India rama nihna pawimawh chelh pha chin- Cabinet Secretary te, Foreign Sec­retary te, Chief Justice of India te, RBI Governor, UPSC Chairman, Chief Elec­tion Commi­ssioner etc te hi kum hnih khat dan lek leka inthlak reng an ni a. A ṭhen phei chu thla hnih khat chauh an ni hman tihin an pension a, mi dangin an thlak ṭhin.

Hetiang hi ni mahse GK lam ngaihven leh tuichilh laklawh tawh chuan an lo hre thip thlep hman zel. A ngaihven lo lahin an hre lo na laileng.

Chanchinbu chhiar ngai lo, news channel en ngai lo, thil thleng pawimawh hriat tum lo leh ngaihven peih lo chu pawl sang ur mahse GK lama an hriatna hi a bil tuih duh khawp mai.

College rap pha ve si, GK mawlmang lutuk pawh hre lo, Union Home Minister emaw Defence Mi­nister tak ngial pawh hre lo te hi zuk awma mawle! IT hmasawnna avangin engkim a awlsam tawh a, inter­net nen kan thlun zawm a, kan hriat duh apiang awlsam takin kan kheuh chhuak zung zung thei tawh lehnghal.

Kum 2017 a IAS topper Anudeep Duris­hetty kha khawi coa­ching class-ah mah a kal lo a, “IAS topper nih theihna hi Google-ah leh YouTube-ah hian a awm” a ti tawp mai. GK ngaihven a, hriatna tih zau tum tan chuan thil hi va awlsam tawh em.

Pu M Lalmanzuala kha pawl riat a nih kumin khawvel ram hrang hrang leh an khawpui hming a hre vek a. An Lal, an Prime Minister leh an President te pawh hriat vek a duh ta zel a, duh ta na na na chuan rei lo te-ah a hre leh ta vek mai a ni. Pawl riat naupang lek khan, “Inrinni apiangin Pu Lalthanhawla te inah nileng deuh thawin lehkhabu leh magazine awm apiang ka chhiar ṭhin” a ti.

Chutiang tak chuan ngaihvenin, hriat tumin, tui chilh i la eng­ah nge kan hriat loh teh lul ang. GK lama hriatna tizau turin ṭan i la thar ang u.

K Lalrinchhana