Sava - Saza - Sa
Kan ṭhenawm maiah hian vál upa phanchang tawh tak hian mahni in chhúng lum aṭanga Sava veh a chíng a! A thäwm ka hriat hi chuan rang takin ka va dâk ṭhin a, inthlahrun nacháng a hre ve deuh ni tùr a ni, an tukverhah chuan a pil leh zuk ṭhin!
Perhthlâk a beisei ka ring lo, perhthla tehrëng pawh ni se an kawmthlang kawr ruam zu lûtin a chhar peih lo tawp ang! A inthem thiam vêl mai mai niin a lang. Hei hian Mizote zia a tifiah hle!
Hêngthiltehianngaihtuah a tithui:
1. Zàmpuimánga lungphun bula rawn chhuak Saza kha a hliam tuar lovin a thi. Thang âwk hliam lung nuai nuai kha a na hle ni tùr a ni, Doctor ten enkawl mah se rei a daih ta lo!
2. Durtláng khàmah Saza an hum halh thu kan hria, mahse kár kal ta lawk khán saza ke an chhar nawlh mai niin an sawi... humhalh tùr kan tlachham zui mai ang em?
3. April ni 15 khán Bilkhawthlir daiah Saza hliam chau tak, a ngháwnga silai kahna hliam nei chu mihringte puih beiseiin a lo chhuak hlawl mai bawk! Bilkhawthlir RO leh staff ten an buaipui an ti... dam khawchhuak zo tak maw!
Kan ûm a kan thal ṭhak ṭhak chung pawh hian min thlahlel niawm takin min la pan ṭalh ṭalh chu a ni si a... khawngaihthlâk hian! Kan khaw kár kawng zin tinuamtu ni tùr khawpa duat nacháng kan hriat hun a nghahhlehawm mang e!
Nikum lawkah kan Sazate hi Goat pox natna avàngin za tam an thi tawh. Goat pox tihhlum bäng tlém azáwng an inthlah pung leh ṭan mék nia lang hi lo suat hmanhmawh a ṭül lo ve. Delhi-a Mizo zinte hian Thehlei an vawm an vawm ngai lo, Varanasi-ah Záwng an ûm an ûm ngai hek lo.... enga tinge Vai Thehlei leh Vai Záwngte mah hmangaih pui thei si mahni rama mi ngei, Mizote ta chu kan phil reng mai bik le! Jain-te phei chuan fanghmìr takngial pawh rah hlum palh hlauin an kalna tùr an phiat fai ṭhin a ni si a!
A tui bîk tlata ngai a, rèp khawng eih uaih kan in ngaihsàn siak ngawt mai te hi chu changkànna lam a kâwk mawlh lo; cancer natna a kâwk zâwk mah! In lamah a aia lian leh tui ṭha ṭha, kan mamawh tâwk hi chu kan vulh mawle! Kut zungpui tia lek Sava ràwt thak tùr buaipuia ram kal fo ai chuan, hna dang ṭhulh hauh lovin chhúng tlai ar vulh ang hmiang! Sakhi leh saza te aiah kèl, sanghal aiah vawk, ram sial aiah bâwng kan la nei cheu!
Hmänah kawmthlang rah tlàn sava chu naupangin an rawn chäng a. Ka pi chuan a lo phal dèr lo, "An hràm màwi tehrëng nèn... nilénga an hràm tluka máwia in hräm ve peih a nih loh chuan veh ka phal rëng rëng lo," a lo ti bur mai! Hràm nilèn an zuam meuh lo a ni ang naupangho chu an bo nghâl diak mai nia!
Hei hi hmaih a thiang lo... Zampuimanga lungphun bula Saza inlár khân thurochhiah min hnutchhiah. Chu thurochhiah chu he zawhna pahnih mai hi a ni:
1. Pathianin enkawltu ni tùra a ruat mihringte kiangah thilnungte hi an zalèn em?
2. Leilung, boruak leh tuite hi mihringte avàngin an him nge an chhe mék?
Chris M.S Dawngkima, Ramhlun North