VANTLANG KAWNGPUI

Tunlai lirthei te hi chak tak taka tlan thei tura siam a ni a, khawpui chhung bik angah te hi chuan Motor Vehicles Act leh Rules dungzui hian tlan chak zawng tur bithliah chu a ni nameuh mai.

National Highway te leh State Highway kan tih ang te erawh hi chu lirthei/ motor chak tak taka tlan theihna tura duan a ni.

Chuvang chuan, Highway kawngpui angte ruahman a nih dawn hian mahni khaw bil/mipui chen­na tlawhtir tum hram hi a finthlak lem lo. Highway pawh turin kan khaw kawng emaw chu kan sial zui mai zawk tur a ni ang.

Veng chhunga tlawmngai ṭhenkhatte emawin an khaw paltlangtu Highway-a lirthei tlan chak zawng tur an lo tar ve ngawt ang te/ speed braker (lirthei tlan ti muang tur) an lo siam ve leh ngawt mai si te hi dan pawisaklohna leh palzutna, a hman hman intih thuna bak entir a nei awm lo ve.

Lirthei chu a tlan chak a nih pawhin, a khawl leh a khalhtu thunun phak reng a ni tur a ni a, kawngpui a zauh leh mam ṭhat avanga chet sualpui ta mai te hi driving license pek chhuah tlak loh an ni.

National High­way chungthua kan dan neihte:

The National Highways Act, 1956

The National Highways Authority of India Act, 1988

The National Highways Rules, 1957

The National Highways (Temporary Bridges) Rules, 1964

The National Highways (Collection of fees by any person for the use of section of National Highways/ Permanent Bridge/ Temporary Bridge on National Highways) Rules, 1997

The National Highways (Rate of fee) Rules, 1997

The National High­ways (Fee for the use of National Highways section and Permanent Bridge-Public Funded Project) Rules, 1997

Dan kan en chuan, National Highway dang ping emaw, zin veivah emaw, bung­raw thiar vel himdam lo zawnga rokhawlhna thlentu chu kum nga (5) thleng lung in tan leh pawisa chawia hrem theih a ni [S. 8-B, National Highways Act, 1956].

National Highway kalkawng Vairengte - Aizawl - Lunglei kawngpui te hi kal­kawng lai tak aṭanga teha 12.00 metres huam chhungah in emaw, thil dang reng reng sak phal a ni lo [Vide, Notification No. LRR, 207/8/pt. Dt. 5/11/1982 (Mizoram Gazette, Vol. XI, Issue No. 43 p. 10 Dt. 5/11/1982]

Khaw tam takah National Highway/ kawngpui bawha in sak kan ching leh kawng hnai lutuka kan in kulh ṭhin pawh hi dan bawhchhiatna a ni thei e.

Dr. H.T.C. Lalrinchhana, Zamzik Siang Bethel Veng, Zemabawk