Sawrkar zu zawrh dan tur riruang a lang ta ruak e

Excise & Narco­tic Department, Go­verment of Mizo­ram-in The Mizoram Liquor (Prohibition) Rules, 2019 an siam chu Governor, Mizo­ram chuan hman a phalsak tawh a, siamrem ngai awmte peih a niha Mizoram sawrkarin rem a tih hunah MLP Rules chu Mizoramah hman ṭan a ni ang.

Excise & Narcotic Department hotute aṭanga thu kan hriat danin, zu khapna dan Mizoram Li­quor Prohibition Act hman ni tawh mah se la, MLP Rules a la awm loh avangin an zu mante chu Department Store Room-ah an kawl khawm rih a, zu man khawm sa tihralna dan tur duan The Mizoram Liquor (Prohibition) Rules, 2019 chu Mizoram Governor chuan a phalsak tawh a, Rules-a a inziah dan chuan, zu lei/in phalna a pekte hnenah sawrkarin zu a man khawmsa chu hralh dawn a ni.

Governor-in hman a phal tâk The Mizoram Liquor (Prohibition) Rules, 2019-a a inziah dan chuan ram khat hotu, ambassador, etc. foreign lam mi, hna neia ram dang a-

ṭanga Mizoram rawn tlawh, foreign lam mi Mizorama firm neia thawk, tourist (foreigner leh state dang aṭanga lo kal)-te bakah, hriselna dinhmun avanga doctor-in in a phalsakte hnenah zu lei phalna pek theih tura tih a ni.

The Mizoram Liquor (Prohibition) Rules, 2019 hmang tur hian Mizoram sawrkar chuan thuchhuah a siam leh phawt dawn nia sawi a ni a. Sawrkarin notifi­cation a chhuah hunah zu hralh dan turte bithliah a ni ang a, chumi hnuah Rules chu hman theih a ni ang.

An sawi danin, zu hi Aizawlah chauh hralh a nih rin a ni a, district hrang hranga zu man khawm sa zu ṭha leh in tlakte chu Aizawlah thawn luh vek a ni ang a, chung zute chu Excise & Narcotic Departmental Store-ah dah a ni ang a, phalna neite hnenah zu man khawm sate chu hralh a ni ang. District lam chuan MLTP Rules ang tho khan, a man khawm hna chauh an thawk dawn a ang hle a ni.

Zu hralhna aṭanga sum hmuhte chu sawrkar sum bâwmah dah a ni ang.

- ZMP Tlau