Ziak ngeia finfiahna

Mizoram Legislative Assembly budget session hnuhnung berah khan finfiahna 'ziak' leh 'audio' tih vel a lâr hle mai a; a pawi­mawh bawk a ni ngei ang. MLA aṭanga Pu Lalduhoma bântir a nihna kawngah pawh 'ziak' bawk a pawi­mawh niin a lang.

Mahse, Pu Duhoma chungchangah hian mahni ṭanfung tichak tura 'ziak' an ngaih pawimawh a, an ṭan chhan ber a nih laiin, lehlam tana ṭanfung tiṭha thei tur 'ziak' leh 'ziak lo' erawh chu an ngaih pawimawhsak duh si lo, tiin a sawi theih awm e.

Pu Lalduhoma kha kum 2018-a MLA inthlan dawnah khan ZPM mi leh sa a ni satliah mai lo a, ZPM chief ministerial candidate a ni tih chu kan hre tlang vekin a rinawm a; inthlana chak zui ta MNF leh political party dang hotute mai bakah, mipui nawlpuiin an hria a ni. ZPM candidate-te khan 'ziak' leh ṭawngkain ZPM-a rinawm turin thu an tiam a nih kha; chutah chuan Pu Duhoma pawh a tel a ni.

Kum 2018 inthlanpui laiin ZPM chu Election Commission of India-in a pawm (registered/ recog­nised) party a la ni lo a; mahse, ZPM chu a din chhan te, a nihphung te, an thil tumte leh hma an lak dante chu political party dang ang tho a ni. Politics hmangin ram kaihhruai leh siamṭhat an tum, a tih theih ang. Chu chu political party-te din chhan leh nihna a ni rêng a.

Kum 2019-ah em ni, ZPM chu ECI chuan a pawm ta a, registered political party a ni ta a. Ka hriatthiam ve danah chuan, ZPM hi 2018 inthlanpui hma leh hnuah emaw, ECI-in a pawm hma leh pawm hnuah emaw pawh an din chhan te, an nihphung te, an thil tumte leh hmalak dante a la pangngai reng a; an buaipui ber chu politics a la ni char char, tih hi a ni.

MNF party leh an kaih­hruai sawrkarin MLA aṭanga Pu Lalduhoma an bân­tirnaah hian (bântirtu tak chu Assembly Speaker ni mah se, MNF hotute hmalakna ni ngei turah ka lo ngai ve ngawt a!) an ṭan chhan pui ber chu 'ziak' niin a lang. Pu Duhoma kha ZPM mi leh sa niin, ZPM CM candidate hial ni mah se, an pawl chu ECI registered/ recognised party a la nih miau loh avangin dan angin ZPM candidate a ni thei lo a, amah leh ZPM candidate zawng zawng chuan 'Independent' candidate an nih thu nomination paper-ah a 'ziak' lang a ni. Chu tak chu MLA aṭanga bântirtute pawhin an ṭan chhan pui ber a ni.

Pu Lalduhoma nomina­tion paper-a ziaka awm, 'Independent' tih chu MNF party hotu te, an MLA-te leh Assembly Speaker ten an ngaih pawimawh ber a nih laiin, ZPM party-a Pu Lalduhoma nihna leh dinhmun 'ziak' ngeia a awm dan leh awm loh dan erawh chu an ngai pawimawh leh duh si lo niin a lang.

ZPM party hi ECI regis­tered party a nih hnuah Pu Lalduhoma chu ZPM party-ah member a nihna emaw, hruaitu a nihna emaw, nihna dang eng pawh a nei a ni tih tichianga finfiah turin 'ziak' a awm leh awm loh an ngai pawimawh duh tawh lo a. Chief Minister nge, Speaker zawk ka chiang ta lo (an ni ve ve mai thei bawk a), 'ZPM a ni ngei tih ziakin awm lo mah se, a chêt danin a tichiang...' tih ang deuhin an sawi a ni. Kha maw, bân a nihna turah 'ziak' an ngaih pawi­mawh em em laiin, an ṭanhmun tiphet thei tur thil chu ziaka a awm leh awm loh an ngai pawimawh duh tawh tlat lo!

Chief Minister/ Speaker-in Pu Lalduhoma chu bântir a nih theihna turin, 'ZPM a ni ngei tih ziakin awm lo mah se, a chêt danin a tichiang...' tih lam hawia an sawi ang chiah hian, kum 2018 inthlanpuiah khan nomination paper-ah 'independent' tiin ziak mah se, ZPM mi leh sa, an CM candidate a ni tih pawh kan chiang tlang a ni lo'm ni? ZPM candidate a ni ngei tih pawh ziak leh ṭawngkain thu an tiam miau avangin a chiang viau bawk.

Chuvangin, MNF party leh an kaihhruai sawrkar hotute hian Pu Lalduhoma hi MLA aṭanga an bântir theih nan ECI pawmpui leh pawmpui loh chungchang ṭanfungah an hmang lui a, rem lo tak chungin kawng an zawng ngar ngar ni ngeiah ka lo ngai ve a ni tih, thiam lo tak chungin ka rawn puang ve a ni.

ZPM chief ministerial candidate kha 'A ZPM em mai' tiin MLA aṭanga bân­tirna atan an hmang zawk tlat mai hi chu thil mak ve tak zawng a ni e!

Sanghluna Khiangte