AIZAWL TRAFFIC JAM BAWK HI

Kan sorkar hian kawng hrang hrangin hma an la a, motor intlan chhawk kan ti a. Hei bakah traffic jam tih reh nan sum vaibelchhe tel tehmeuh PAHOSS hnuaiah sem ni mah se a ngai reng emaw tih tur a ni. Bawngkawn leh Vaiva­kawn- ah chuan ‘a zualzapui vailenhlo’ tih ang mai a ni. A chhan pakhat chu motor pung chak lutuk hi a ni.

A nei lovin motor thar leh two wheeler neih an duh a, neih thinglung khawngin an lei a, a nei sa tawh lahin a chhuak thar lei tumin ṭan an la a. Heng motor company hrang hrang- Maruti Suzuki, Hyundai Motors, TATA Motors, Mahindra & Mahindra, Toyata, Renault, Ford Motor, Honda Cars, Nissan etc etc. heng motor siamtu company-te hian hralh tam loh hlau-in Agent kal tlangin Aizawl veng penhlehah hian motor thar an dah nghek nghuk a ni. Eng atan zozai nge maw chu tih mai awl a ni.

Heng ka han sawi aia tam fe hi two wheeler a lo lut reng bawk a ni. Aizawlah hian Mizoram mipui zaa sawmthum (30%) lai awmin an sawi a. Lirthei hi chu 30% aia tam Aizawlah a awm a rinawm tawh. Chuvang chuan traffic jam hian kian zai a rel thei lo a ni ber.

Aizawla traffic jam zia­awm nana pawimawh nia ka hriat ve thil pali han sawi ila:-

1. In sakna bungrua phurh hun :- He bungrua ce­ment, rod, balu, brick etc. te hi traffic tawt lai office kal hun lai hian an lo inrawlh ve chhen a, office kal a tibuai nasa a, traffic a ti jam fo mai. Heng in sakna bungrua 407 emaw Pick-up in emaw phurh hun hi zing dar 9 hma ngei nise, emaw zan lam nise, chu chu in sa tur tan pawh a remchang zawk a ni.

Office kal hun laia Pick-up in rod lawr vung mai kawng chho deuhah han chhawm chu zo leh zo lovin kan hmaah an kal thin hian traffic a tih jam mai bakah a hlauhawm hle a ni. Chuvang chuan dawr bungrua leh in sakna bungrua reng reng chu zanah emaw zing dar 9 hma ngei a loading/unloading nise.

2. Kawng behchhana Workshop:- Hun engemaw lai khan khawpui chhunga motor workshop leh two wheeler workshop te insawn vek tur an tia maw ka ti a, ka lo lawm hman viau tawh a, mah se tun thlengin kawngpui behchhanah workshop a la awm fur mai. Hmun tam takah hmuh tur a la awm. Thuneitu te beng a la thleng lo nge ni, hetiang kawngpui kama workshop hian an motor/ two wheeler siam tur te kawng dungah an dah mai ṭhin avangin traffic a ti jam nasa ṭhin a ni. Entirnan pakhat han sawi ila, Bawngkawn Red Rose a motor workshop hian a motor siam turho chu kawng chanve dawn thleng an tlar mai ṭhin a ni. A bak kawngpuiah motor lian pahnih in pel tur avangin traffic a jam fo a ni.

Kan hotuten an la hmu ve lo nge tun thlengin motor chhia an la tlar nghuk mai. Hetiang hi Aizawl khaw chhungah hian a la awm nual mai. Two wheeler workshop phei chu veng tinah hmuh tur a awm. Hetiang hian traffic a ti jam nasa hle a ni.

3. Parking lot:- Kan AMC lam hian Parking fee khawn lamah ṭhahnem an ngai deuh nge kawngpui zau vak loah thlengin motor/ two wheeler park na hmun rin var, mark hmuh tur Aizawl veng hrang hrangah hian a tam mai. Hmun awl zau leh kawng zau pawh nilo motor inpelh theihna tawk tawk a Parking Lot ruahman hian nasa takin traffic a ti jam a ni. AMC hotute hian Local Council te Parking Lot an siam hi enpui a ṭha ngawt mai.

4. LPG (gas) kawngdunga sem:- Hmunhma kan neih loh avangin kawng dungah gas kan sem mai ṭhin. A phurtu motor chu kawngsirah ding mahse, gas latu khan kawng an kian ta ṭhin lova chuvang chuan engemaw chen traffic a ti jam ṭhin. Kan vengah chuan home delivery system kan tia, kawng dungah gas kan sem tawh lo. Heihi khawpui danga an tih dan a ni.

Gas laka hun khawhral a awm ve lova, traffic kan ti jam ve lo.

Zika, Falkland Veng